Dhimitraq Toli, kryetari i Bashkisë Dropull po i bashkohet listës së zyrtarëve që abuzojnë me tenderët. Megjithëse kryen investime të pakta, Toli edhe këto i prokuron në shkelje të ligjit.
I tillë është tenderi i përfunduar nga Bashkia Dropull më 5 tetor 2023, me objekt “Mbrojtje nga përroi i Selosë Dropull, Faza I’, për të cilin Toli ka planifikuar të shpenzojë 320 milionë lekë.
Këto miliona, sipas grafikut të punimeve, do të shkojnë për llaç e suva që do të hidhet në urë dhe në anësoret buzë rrugës së përroit. Është një punë që mund të kryhet me më pak para, sepse këtë e tregojnë edhe ofertat që kishin ardhur.
Por, Toli e ka paracaktuar se ku do të shkojnë lekët e përroit. Siç shihet në dokumentin më poshtë, për këtë tender kanë paraqitur ofertat e tyre jo pak, por 25 kompani. Të paktën 7 prej tyre kanë dhënë oferta shumë më të lira për të zhvilluar këtë projekt. Por, këto oferta ekonomike nuk janë marrë parasysh fare! Sëbashku me 7 ofertat më ekonomike, në total Toli skualifikoi që në fazën e parë 24 kompani.
Kështu, mbeti mbi tavolinë e tij vetëm zarfi i firmës “EC PRO PARTNERS” SHPK me ofertë 240 milionë lekë. Ndërkohë ofertat e tjera vajonin nga 100 milionë lekë më lirë se sa fituesi. Ose më saktë më lirë se sa kompania që ishte paracaktuar si fituese nga Toli.
Sepse të shkualifikosh 24 kompani dhe ta japësh tenderin pa garë tek oferta më e shtrenjtë është një skemë korrupsioni e përhapur në proceset e prokurimit, sidomos ato që firmosin kryebashkiakët.
Ky tender është veçuar nga monitoruesi Open Data për riskun e lartë të korrupsionit dhe është shënuar me “Flamur të kuq”.
Kompania përfituese është pronë e Ali Aliut nga Erseka, i cili ia ka dhuruar aksionet Migel Aliut dhe Emiliano Delilajt. Është një kompani modeste përballë konkurrentëve, ku e vetmja kontratë që ka fituar është riparimi i një fushe kalçetoje në Përrenjas në 2 tetor 2023. Kontrata ka vlerën 1.5 milionë lekë të dhëna nga kryebashkiaku Nuri Belba.
Nga ana tjetër, nga verifikimet që vëri Gijotina.com, kompania fituese e tenderit në Dropull ka qenë një kompani që deklarohej me humbje deri në vitin 2022.
Që këtu dalin dy shkelje të rënda, që mund ta jenë prova kundër kryebashkiakut Toli në një hetim të mundshëm nga SPAK-u. Së pari, kompania në fjalë nuk ka kapacitet për të kryer punën sepse duhej të kishte kryer më parë një projekt të ngjashëm që të kushtonte minimumi sa 40 përqind e kësaj kontrate. Ndërkohë, një problem tjetër lind me angazhimin në të njëjtën kohë në dy kontrata për punë publike, në dy bashki të ndryshme nga kjo kompani, në Përrenjas dhe në Dropull. Kështu rrezikohet zbatimi i afateve të punimeve.
Ky është mandati i dytë i Tolit dhe siç duket rikonfirmimi në krye të bashkisë i ka dhënë më shumë siguri që të veprojë i shkujdesur ndaj ligjit.
Kujtojmë se një vit më parë Dhimitraq Tolit iu akordua ”Certifikate Mirënjohje” nga Prefekti i Qarkut Gjirokastër, z. Astrit Aliaj, për kontributin e tij në përballimin e krizës humanitare në Doganën e Kakavijës, por edhe për solidaritetin që ka treguar si gjate përballimit të pasojave nga tërmeti i 26 Nëntorit të vitit të kaluar, ashtu edhe në marrjen e masave paraprake për parandalimin e Covid -19.
Lind një pyetje për prefektin, a do ta dekorojë prapë kryebashkiakun, tani për skemat abuzive me procedurat tenderuese? Toli bën rrallë tendera, por kur i zhvillon, i bie me top, e lëshon dorën fare me paratë e taksapaguesve.
Dy transformatorë të artë, 8 MLN Euro: Tenderi pa garë i Karakaçit dhe Dalipit
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post