“Nga Fiorentina dhe Interi pres një finale të bukur mes dy skuadrave që janë mirë fizikisht dhe mendërisht dhe kanë edhe finale të tjera për të luajtur. Interi duhet të jetë favorit, por do të isha i lumtur nëse Fiorentina do ta fitonte Kupën, ndërkohë që Interi shpresoj ta kompensojë në Champions Legaue”.
Ka qenë ky parashikimi i Françesko Totit për fituesin e Kupës së Italisë, një trofe, të cilin vetë ai e ka ngritur dy herë. Ish-kapiteni i Romës ka folur edhe për praninë në finalet e kompeticioneve europiane të tri italianeve, duke u ndalur edhe te Roma.
“Jam shumë i lumtur për tri ekipet italiane në finalet europiane dhe shpresoj që të arrijnë të sjellin trofe në Itali. Është një pikënisje e mirë edhe për t’i bërë kombet e tjera të kuptojnë se Italia është gjithmonë një ndër vendet më të rëndësishme. A mund të ketë ndikim fitimi i Europa League në të ardhmen e Murinjos në Romë? Duke fituar trofeun ke një mentalitet të ndryshëm, një qasje ndryshe ndaj kujtdo. Sigurisht që Murinjo është Murinjo edhe nëse humbet, por duke fituar ndryshojnë edhe perspektivat për të ardhmen”, tha italiani.
Në fund Toti foli edhe për vendimin që u mor mbi penalizimin mbi Juventusin. “Pas vendimit të marrë, skenari ka ndryshuar pak. E gjithë çështja e kualifikimit në edicionin e ardhshëm të Champions League është rihapur dhe në dy javët e fundit të kampionatit do të shohim se cila skuadër do ta arrijë këtë objektiv prestigjioz”, përfundoi 46-vjeçari.
Discussion about this post