Prokuroria e Posaçme kundër Korrupsionit dhe Krimit të Organizuar (SPAK) ka nisur hetimet për dy vepra penale, shpërdorim detyre dhe shkelje të barazisë në tendera, pas kontrolleve të ushtruara një ditë më parë në banesën dhe zyrat e biznesmenit izraelit Ron Yeffet, Ardi Veliut dhe personave të tjerë të lidhur me kompaninë KAYO.
Hetimi u nis kryesisht pas disa audio-përgjimeve të publikuara nga ish-zëvendës kryeministri në arrati Arben Ahmetaj, në qendër të të cilave ishte biznesmeni Yeffet, i cili bisedon me dy shtetas të huaj të identifikuar si Igor dhe Sergei. Ahmetaj deklaroi se bisedat lidhen me një skemë të dyshuar për trafik armësh dhe municionesh përmes Shqipërisë.
Burime konfirmuan se Prokurorët e SPAK po hetojnë rreth dyshimeve të ngritura se kompanitë e Yeffet janë favorizuar nga zyrtarët shtetërore për lidhjen e kontratave.
Në qendër të hetimit janë kompanitë Timak Defence dhe ADVANCED ARMS TECHNOLOGY. TIMAK Defence zotërohet nga TIMAK ne masën 80 për qind dhe KAYO 20 për qind. Ron Yeffet është zotëruesi 49% i kompanisë Timak, ndërsa 51 për qind e zotëron Arjeta Puca.
ADVANCED ARMS TECHNOLOGY, zotërohet nga UNO 18 me 80 për qind të aksioneve, ndërsa shteti është aksioner me 20 për qind përmes KAYOS. Kompania UNO 18 ka dy aksionerëve, Ron Yeffet dhe Arjeta Puca që zotërojnë nga 50 për qind të aksioneve secili.
SPAK zbarkoi në vilën në përdorim të biznesmenit Yeffet. Ky i fundit sipas hetuesve të BKH-së u gjet në banesë dhe krahas të tjerave iu sekuestruar edhe celulari. Ndërsa lidhur me drejtorin e kompanisë shtetërore KAYO, Ard Veliu, hetuesit shkuan në mëngjes në banesën e tij, por ai nuk ndodhej aty, për shkak se ishte nisur për në punë.
Mësohet se hetuesit kanë shkuar në ambientet e “KAYO” dhe në zyrën e tij të punës kanë zbatuar vendimin e Gjykatës së Posaçme, për kontrollin personal, ç’ka nënkupton marrjen e telefonit celular. Njëherazi hetuesit kanë sekuestruar dokumente dhe kanë marrë celularin e një zyrtari të lartë të Ministrisë së Mbrojtjes.
Kontrolli në institucionin e mbrojtjes ka zgjatur 1 orë e 30 minuta. Burimet thanë se në ambientet e kompanisë TIMAK janë marrë dhjetëra faqe dokumente, kryesisht kontrata. SPAK ndërkohë ka firmosur fletëthirrjet e para për të marrë dëshmitë e personave që kanë dijeni. Arben Ahmetaj nga ana tjetër ka lënë të nënkuptohet se disponon të tjera audio-përgjime që kanë në qendër biznesmenin Yeffet.
Discussion about this post