SPAK ka identifikuar një prej pjesëtarëve të grupit kriminal të përfshirë janë dhe anëtarë të fisit Rraja, që trafikoi rreth 2.4 ton drogë nëpër shtete të Evropës dhe Ekuador.
Emiljan Burbës i është komunikuar masa në qeli, i arrestuar për të tjera ngjarje kriminale. Ai dyshohet se ka drejtuar një prej 3 episodeve të trafikut të drogës të dokumentuara nga SPAK. Konkretisht bëhet fjalë për trafikimin e 236 kilogramë marijuanë të nisur nga Shqipëria drejt Turqisë.
Sipas SPAK, hetimet për procedimin penal të regjistruar në janar të vitit 2024 janë zhvilluar në bashkëpunim me autoritetet europiane të drejtësisë, Byronë Kombëtare të Hetimit, Policinë Kriminale, si dhe me mbështetjen e Eurojust dhe Europol.
Nga hetimet ka rezultuar se grupi kriminal organizonte trafikimin e drogës nga Shqipëria drejt Malit të Zi me destinacion final Gjermaninë, nga Shqipëria drejt Turqisë, si edhe nga vendet e Amerikës së Jugut drejt vendeve të Bashkimit Europian.
Një pjesë e provave është siguruar përmes analizës së komunikimeve të zhvilluara në platformën Sky ECC, të administruara nga autoritetet franceze në kuadër të bashkëpunimit juridik ndërkombëtar.
Sipas dosjes hetimore, janë dokumentuar tre raste të rëndësishme të trafikut ndërkombëtar të drogës:
Më 3 nëntor 2020, autoritetet e Malit të Zi sekuestruan 1,722 kilogramë marijuanë, që ishte transportuar nga Shqipëria me destinacion Gjermaninë.
Më 26 janar 2021, autoritetet turke bllokuan 236 kilogramë marijuanë, të nisura nga Shqipëria drejt Turqisë.
Më 23 nëntor 2020, autoritetet holandeze sekuestruan 475 kilogramë kokainë në portin e Vlissingen, ngarkesë që kishte mbërritur nga Ekuadori.
Nga këqyrja dhe analiza e të dhënave të administruara, është bërë e mundur identifikimi fillimisht i 14 personave nën hetim, të proceduar më parë për interesa të këtij procedimi penal: I. S., (alias X.,), E. Sh., R. Rr., B. S (alias X), A. N (alias L. S.,), H. S (alias X, alias L.,), V. B., P. Rr., G. Rr., A. A., (alias Ç.,), A. Gj., (alias I.,), A. Q., J. Ç., dhe M. B., ndaj të cilëve, janë caktuar dhe masat e sigurimit personal pasi dyshohen se kanë qenë të përfshirë në veprimtari kriminale në trafikimin të lëndëve narkotike.
Hetimet e mëtejshme çuan në identifikimin e shtetasit Emiljan Burba, i cili, sipas prokurorisë, ka pasur rol drejtues, veçanërisht në organizimin e trafikut të drogës drejt Turqisë.
Me vendim të Gjykatës së Posaçme të datës 3 korrik 2026, ndaj tij u caktua masa e sigurisë “arrest në burg”, e cila u ekzekutua më 6 korrik nga strukturat e Policisë së Shtetit.
Burba akuzohet për veprat penale “Trafikim i lëndëve narkotike”, kryer në kuadër të një grupi të strukturuar kriminal, “Grup i strukturuar kriminal” dhe “Kryerje e veprave penale nga organizata kriminale ose grup i strukturuar kriminal”.
SPAK bën të ditur se hetimet vijojnë për identifikimin dhe dokumentimin e rolit të personave të tjerë që dyshohet se janë përfshirë në këtë rrjet kriminal ndërkombëtar të trafikut të drogës.
SPAK falënderon autoritetet e drejtësisë turke, ekuadoriane, Eurojust dhe Europol për mbështetjen dhe ndihmën e dhënë.
gijotina.com/
Discussion about this post