Gjykata e Tiranës la në burg 4 shtetasit kosovar, të arrestuar për trafik armësh. Togat e zeza vendosën masën “arrest në burg” për Blerim Krasniqin, Benjamin Shalën, Edonis Thaçin dhe Muhamed Krasniqin.
Gjatë operacionit për goditjen e këtij aktiviteti u sekuestrua 10 armë zjarri, teksa personat e përfshirë u kapën në vend parkimin e një terminali autobusësh, në Lundër.
Shtetasi Blerim Krasniqi dyshohet se ka vënë në autobusin me drejtues Edonis Thaçin një çantë brenda së cilës u gjetën 10 armë zjarri pistoleta, 10 krehra dhe sasi municioni luftarak.
Krasniqi në bashkëpunim me Muhamed Krasniqin akuzohen se kanë ndjekur me automjetin e tyre, autobusin, gjatë gjithë itnerarit.
“Nga verifikimet e kryera ka rezultuar se armët e zjarrit ishin trafikuar në Tiranë, me qëllim shitjen në vlerat 1500-3000 euro. Po nga verifikimet e kryera dyshohet se pronari i linjës së autobusëve, shtetasi Edonis Thaçi së bashku me shtetas të tjerë, ka trafikuar armë zjarri drejt Shqipërisë, në disa raste”, do të njoftonte policia.
Katër shqiptarët e Kosovës, u arrestuan të premten e 24 majit nga policia e Tiranës. Sipas hetimeve, ata i merrnin armët nga Serbia dhe i shisnin brenda territorit tonë. Dyshohet se bashkëpunonin me persona serb, ndërsa armët prodhoheshin në Çeki. Katër kosovarëve iu gjetën komunikime me persona të tjerë blerës të armëve të tyre.
Discussion about this post