Të paktën 31 persona kanë humbur jetën dhe 15 të tjerë janë plagosur kur një autobus i transportit publik ra në një greminë në një rrugë që lidh qytetet e Potosí dhe Oruro në Bolivi.
Aksidenti ka ndodhur në lartësinë e urës në komunën Yocalla, në provincën e Tomás Frías, ku autobusi ka rënë në një argjinaturë 800 metra, teksa ka marrë një kthesë me shpejtësi të madhe.
Media lokale e lajmeve raporton se disa nga të plagosurit ishin në gjendje të rëndë. Mes të plagosurve, katër janë të mitur dhe dy prej tyre ndodhen dhe në terapi intensive.
Aksidentet rrugore vdekjeprurëse janë të zakonshme në Bolivi, për shkak të infrastrukturës së dobët rrugore.
Ky besohet të jetë aksidenti më i rëndë rrugor, i raportuar në vendin e Amerikës së Jugut deri më tani këtë vit.
Muajin e kaluar 19 persona u vranë kur një autobus tjetër doli nga rruga, gjithashtu pranë Potosit.
Sipas të dhënave të qeverisë, aksidentet rrugore vrasin mesatarisht 1400 njerëz çdo vit në vendin me rreth 12 milionë banorë.
Discussion about this post