Janë zbardhur detaje të reja nga tragjedia e regjistruar të mërkurën në Selanik të Greqisë, me protagonist një çift shqiptar, ku 44-vjeçarja Valentina Menkshi u masakrua me thikë nga bashkëshorti i saj, Afrim Menkshi brenda banesës dhe më pas ky i fundit u hodh nga ballkoni duke i dhënë fund jetës.
Sipas rezultateve të ekspertizës mjeko-ligjore të trupit të 44-vjeçares, ajo duket se ka marrë mbi 40 plagë me thikë në pjesë të ndryshme të trupit. 53-vjeçari dyshohet se ka përdorur katër thika të ndryshme për t’i marrë jetën, të cilat janë gjetur gjurmë gjaku mbi to dhe janë sekuestruar nga policia.
Viktima sipas mediave greke, mësohet se ka marrë plagë në qafë, fytyrë, në krahë dhe në bark, të kanë qenë aq të forta, saqë njëra nga thikat është përkulur.
Raportohet se varrimi i gruas do të bëhet nesër (14 Mars) në Shqipëri. Gjithashtu edhe varrimi i 53-vjeçarit do të bëhet në atdhe në ditët në vijim. Ndërkohë dy vajzat e çiftit shqiptar, 16 dhe 21 vjeçe, të cilat humbën papritur prindërit, ndodhen në gjendje shoku dhe mësohet se nuk kanë mundur të dëshmojnë në polici.
Mesditën e së mërkurës, pak para orës 13:00 kur ndodhi vrasja, fqinjët nuk kanë dëgjuar zëra nga banesa e katit të dytë ku çifti jetonte me dy fëmijët.
“Jemi në banesën ngjitur dhe nuk kemi dëgjuar as zhurmë, asgjë. Ata shkonin në punë, ishin familje dhe kishin fëmijë”, deklaroi një fqinj.
Vrasja ka ndodhur për shkak të konflikteve në çift, pasi Valentina ishte shprehur tek një mik i saj rreth mosmarrëveshjeve që po kalonte me bashkëshortin, rrëfim ky që nuk përputhej me sjelljen e autorit, me të cilin ajo kishte dy fëmijë.
Discussion about this post