Efektivi Arjan Tase, i cili vrau pasditen e 2 gushtit vogëlushen Jonada Avdia në plazhin e Potamit do të dalë sot në orën 10:30 para Gjykatës së Vlorës, për masën e sigurisë.
Komisari Tase u arrestua 3 ditë më parë pas ngjarjes tragjike në plazhin e Potamit, ku skafi i drejtuar nga ai goditi për vdekje 7-vjeçaren Jonada Avdia.
Një ditë më parë, Prokuroria e Vlorës rëndoi akuzën ndaj Arjan Tases nga vrasje nga pakujdesia në “vrasje me dashje” duke rrëzuar në këtë mënyrë mbrojtjen që i bëri AMP( Agjencia e Mbikëqyrjen Policore).
Akuza e qytetit bregdetar ka dërguar dosjen në gjykatë dhe mbi Tasen ka ngritur akuzën e vrasjes me dashje. Neni 76 i kodit penal parashikon që kjo vepër penale të dënohet me burg nga 10 deri në 20 vite.
Vajza 7-vjeçare e familjes Avdia humbi jetën mesditën e 2 gushtit në Himarë, teksa pushonte me familjen e saj.
E mitura u përplas për vdekje teksa ishte në breg, nga mjeti i fuqishëm motorik që drejtohej nga ish-shefi i komisariatit të Himarës, Arjan Tase.
Discussion about this post