Tirana është zgjuar nga një ngjarje e tmerrshme ditën e sotme, ku një zjarr i fuqishëm ka përfshirë një apartament në katin e tretë të një pallati në zonën e Astirit. Fqinjët e banesës në flakë janë zgjuar rreth orës 05.55 nga britmat e familjes që ndodhej brenda, të cilët fillimisht kanë dalë në ballkon për t’i shpëtuar djegies.
Menjëherë, banorët kanë njoftuar policinë dhe zjarrfikësit, të cilët janë nisur për në vendin e ngjarjes, por vonesa e tyre ka bërë që nënë e bir, të cilët ndodheshin në banesë të hidheshin nga kati i tretë me qëllim për t’i shpëtuar djegies.
Si pasojë e hedhjes, 62-vjeçarja e vetëhedhur, Hava Osmënaj dhe djali i saj 36-vjeçar, Klodian Osmënaj, i cili sipas fqinjëve, është me probleme mendore, kanë marrë plagë të rënda. Ambulanca, e mbërritur në vendin e ngjarjes, i ka transportuar direkt për në spital, ndërkohë që policia dhe zjarrfikësit kanë mbërritur në vendin e ngjarjes.
Burimet nga spitali bënë me dije se si pasojë e plagëve të marra 62-vjeçarja ka ndërruar jetë në spital, ndërsa i biri ndodhet në gjendje të rëndë shëndetësore nën kujdesin e mjekëve. Nga ana tjetër, policia dhe zjarrfikësit, pasi kanë shuar flakët, kanë nisur hetimet mbi këtë ngjarje. Burimet nga grupi hetimor bënë me dije se zjarri dyshohet se ka qenë i qëllimshëm nga djali i viktimës, i cili vuan nga probleme mendore.
Gjithsesi grupi hetimor është në vend ngjarje për të zbardhur shkaqet e vërteta që çuan në këtë tragjedi.
