Jurgen Klopp do të jetë trajneri i ri i Kombëtares së Gjermanisë, pasi palët kanë arritur marrëveshje për një projekt afatgjatë, raportojnë mediat ndërkombëtare.
Sipas informacioneve të fundit, tekniku gjerman ka pranuar ofertën për të marrë drejtimin e “Die Mannschaft”, duke shënuar një kthesë të madhe në karrierën e tij pas eksperiencave të suksesshme në nivel klubesh.
Burime pranë negociatave bëjnë me dije se detajet e kontratës janë në fazën përfundimtare të finalizimit, përfshirë kohëzgjatjen e saj dhe strukturën e projektit sportiv që do të ndërtohet rreth Klopp.
Një pjesë e rëndësishme e diskutimeve lidhet edhe me largimin e tij të plotë nga strukturat e Red Bull, ku ka ushtruar një rol këshillues.
Federata Gjermane e Futbollit pritet të ndërmarrë hapat formalë në ditët në vijim për të zyrtarizuar marrëveshjen, ndërsa prezantimi i Klopp si selektor i ri mund të bëhet shumë shpejt, sapo të përfundojnë procedurat.
Ndërkohë, për të zëvendësuar Klopp në strukturat e Red Bull është përmendur edhe emri i Oliver Glasner, megjithëse zhvillimet e fundit mund të sjellin ndryshime në planet e grupit.
Emërimi i Klopp konsiderohet si një nga lëvizjet më të rëndësishme të viteve të fundit në futbollin ndërkombëtar, duke vendosur një nga trajnerët më të suksesshëm të epokës moderne në krye të një prej kombëtareve më të mëdha në botë.
Discussion about this post