Numri i mjeteve të transportit publik në qarkullim do të reduktohet me rreth 20 deri në 30 për qind. Operatorët paralajmërojnë ulje të frekuencës së shërbimit dhe kërkojnë ndërhyrje nga institucionet.
Duke nisur nga 1 shtatori 2026, operatorët e transportit publik do të nxjerrin në qarkullim më pak mjete, për shkak të vështirësive financiare për të përballuar kostot e operimit.
Sipas njoftimit të tyre, reduktimi do të jetë në masën 20 deri në 30 për qind, në varësi të mundësive financiare dhe kapaciteteve operative të secilit operator. Si një nga shkaqet kryesore të situatës ata evidentojnë kostot e karburantit.
Operatorët kanë paralajmëruar se reduktimi i flotës do të ndikojë drejtpërdrejt te shërbimi, duke shtuar intervalet mes mjeteve dhe ngarkesën në autobusët që do të vazhdojnë të qarkullojnë.
“Për këtë arsye, njoftojmë se duke filluar nga data 01.09.2026, operatorët e transportit publik do të detyrohen të operojnë me një flotë të reduktuar në masën rreth 20–30%, në varësi të kapacitetit financiar dhe operacional që secili operator ka aktualisht në dispozicion. Masa e reduktimit nuk përbën një zgjedhje të operatorëve dhe as një mungesë vullneti për garantimin e shërbimit normal të transportit publik. Ajo është një pasojë e drejtpërdrejtë e pamundësisë financiare për të mbuluar kostot e operimit me flotë të plotë, sidomos kostot e karburantit, të cilat përbëjnë një nga zërat kryesorë të aktivitetit. Reduktimi i mjeteve në qarkullim pritet të sjellë në mënyrë të pashmangshme ulje të frekuencës së shërbimit, rritje të intervaleve ndërmjet mjeteve, mbingarkesë të mjeteve që do të mbeten në qarkullim dhe vështirësi për qytetarët që përdorin çdo ditë transportin publik”, thuhet në reagimin e tyre.
Operatorët kërkojnë ndërhyrjen e institucioneve përgjegjëse dhe realizimin e kompensimit për kostot e karburantit. Ata argumentojnë se, me kushtet aktuale financiare, nuk mund të vazhdojnë shërbimin me të gjithë flotën.
“Në këto kushte, u kërkojmë institucioneve përgjegjëse që të ndërhyjnë me urgjencë, të japin një përgjigje konkrete mbi kërkesat e paraqitura nga operatorët dhe të mundësojnë realizimin e kompensimit të parashikuar për kostot e karburantit, si dhe vijimin e mbështetjes për periudhën në vazhdim. Operatorët kanë bërë dhe vijojnë të bëjnë çdo përpjekje për të garantuar vazhdimësinë e shërbimit, por në kushtet aktuale financiare operimi me 100% të flotës nuk është më i përballueshëm. Për sa më lart, kërkojmë trajtimin me prioritet dhe urgjencë të kësaj situate, me qëllim shmangien e përkeqësimit të mëtejshëm të shërbimit të transportit publik dhe rikthimin sa më parë të kapacitetit të plotë operacional”, vijon njoftimi.
Nëse reduktimi zbatohet sipas paralajmërimit, nga 1 shtatori në qarkullim do të ketë 20 deri në 30 për qind më pak mjete të transportit publik, ndërsa operatorët presin përgjigje nga institucionet për kërkesat e tyre financiare.
Discussion about this post