Policia e Tiranës ka arrestuar një 30-vjeçar pasi transportonte persona nga vendet e treta në mënyrë ilegale kundrejt pagesës. Ndërkohë iu sekuestruan 10 pasaporta, karta krediti dhe një shumë parash prej 7280 eurosh.
Policia, me anë të një deklarate për mediat shprehet se ka ndaluar një 30-vjeçar, pasi dyshohet se bënte transport emigrantësh të vendeve të treta nga Tirana drejt veriut të Shqipërisë.
Efektivët kanë sekuestruar plot 7200 euro të 30-vjeçarit, shumë parash që dyshohet se është përfituar nga ky aktivitet i paligjshëm.
Njoftimi i policisë:
DVP Tiranë, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, menjëherë pas publikimit të pamjeve filmike, organizoi punën për identifikimin dhe vënien para përgjegjësisë ligjore të një shtetasi të përmendur në video.
Në vijim të veprimeve u bë ndalimi i shtetasit K. Sh., 30 vjeç, banues në Tiranë. Ky shtetas dyshohet se kundrejt shpërblimit monetar, iu kishte premtuar personave nga vendet e treta, të cilët janë futur ilegalisht në vendin tonë, transportimin nga Tirana në drejtim të veriut të Shqipërisë, me qëllim kalimin e tyre në pikat kufitare, me destinacion final vendet e BE-së.
Në cilësinë e provës materiale u sekuestruan 7280 euro, 10 pasaporta të dyshuara të falsifikuara, karta sim, 2 USB, 6 karta krediti, mandate arkëtimi me shuma të ndryshme, dhe 2 vula.
Materialet procedurale i kaluan Prokurorisë, për veprime të mëtejshme.
Drejtoria Vendore e Policisë Tiranë falënderon mediat dhe qytetarët që denoncojnë rastet e paligjshmërisë dhe i fton sërish ata që të denoncojnë çdo rast paligjshmërie në Komisariatin Dixhital dhe në numrin 112, duke iu garantuar anonimat të plotë dhe reagim të menjëhershëm. Rasti u denoncua nga emisioni investigative Piranjat.
Discussion about this post