Për paraqitjen e saj të parë në “Met Gala”, Alexandria Ocasio-Cortez duhej të bënte një deklaratë politike. Dhe meqenëse ajo ishte në natën më të magjishme të modës, e rrethuar nga njerëzit më të fuqishëm dhe më të famshëm në botë, ku kishte mënyrë më të mirë për të shprehur mesazhin e saj, sesa ta shkruante atë në fustanin e mbrëmjes magjike?
Kongresmenja amerikane kishte veshur një fustan të bardhë nga “Brother Vellies”, ku në anën e pasme kishte të shkruajtur parullën politike: “Taksoni të pasurit”.
“Ne gjithmonë duhet të vazhdojmë të shtyjmë veten, të shtyjmë kolegët tanë, të shtyjmë kulturën dhe ta shtyjmë vendin përpara. Moda po ndryshon; Amerika po ndryshon.”- thotë Aurora James, themeluesja dhe drejtoresha krijuese e “Brother Vellies”.
Veshja u përfundua nga një palë këpucë të kuqe nga Brother Vellies, me lidhëse të gjata dhe lule të ndritshme përgjatë thembrës.
Ocasio-Cortez nuk është politikania e vetme që ka marrë pjesë në “Met Gala”-Hillary Clinton erdhi në 2001-por ajo është e vetmja që ka përdorur kohën e saj në qilim për të bërë një deklaratë të diskutueshme politike. Sigurisht, kush tjetër në Uashington do të guxonte?
