Të shumta janë rastet kur bashkitë e vendit zhvillojnë procedura prokurimi me një konkurrent dhe një kompani trajtohet njësoj nga disa bashki. Kjo metodë është përdorur edhe kësaj here nga dy bashki të vendit, siç është ajo e Kukësit dhe ajo e Përmetit. Këto dy institucione kanë hapur tre procedura dhe çuditërisht konkurrenti është i njëjtë tek të dyja dhe është shpallur fitues pa garë.
Fillimisht Bashkia e Kukësit ka hapur një tender në datën 25 janar 2022 me qëllim blerje ushqimesh për kopshte dhe çerdhe. Kjo procedurë mban numrin e referencës REF-17687-01-24-2022 dhe ka fondin limit prej 7.350.000 lekë të reja, ose rreth 74 milionë lekë të vjetra. Procedura është zhvilluar me vetëm një konkurrent, i cili është “GERTI – 1987” dhe duke mos pasur asnjë konkurrent në garë, është shpallur fitues. Pra është zgjedhur procedura që ekspozohet me risk dhe hedh dyshime që fituesi mund të jetë paracaktuar.
Por dyshimet shtohen akoma më shumë, pasi e njëjta gjë ka ndodhur edhe në Bashkinë e Përmetit dhe jo me një, por me dy tenderë. Në datën 31 janar 2022, Bashkia e Përmetit ka hapur dy procedura. E para, me numër reference REF-18022-01-28-2022 ka për qëllim blerje ushqime me origjinë shtazore dhe fruta perime dhe ka fondin limit prej 1.393.320 lekë të reja, ose rreth 14 milionë lekë të vjetra. Ndërsa tenderi tjetër, i shpallur po në të njëjtën datë nga Bashkia e Përmetit me qëllim blerje ushqimesh me origjinë shtazore, mban numrin e referencës REF-18025-01-28-2022 dhe ka fondin limit prej 1.131.690 lekë të reja, ose rreth 11 milionë lekë të vjetra. Në të dyja këto tenderë ka në garë ka marrë pjesë kompania e sipërcituar, pra “GERTI – 1987”. Edhe këtu kjo kompani nuk ka asnjë konkurrent dhe duke mos bërë asnjë garë, është shpallur fituese.
Meqenëse procedurat janë të treja pa garë “Open Data” i ka futur në kategorinë e flamurit të kuq dhe me të njëjtin mbishkrim për mungesë konkurrence.
Nuk e dimë të jetë vallë rastësi, por e njëjta kompani të fitojë 3 tenderë nga dy institucione të ndryshme dhe në të dyja rastet i merr pa garë, kjo tregon se diçka ka këtu. Por diçka e kemi të sigurt, kompania “GERTI – 1987” është aq e dashur për bashkitë e vendit, sa jo pak herë e hasim në shumë tenderë publik që merr pjesë është e vetme dhe nuk ka asnjë konkurrent përballë. Kujtojmë se kjo shoqëri zotërohet nga Elgert Laskaj, me zyra qendrore në fshatin Çarshov të Gjirokastrës. Kujtojmë se edhe ditën e djeshme, Gijotina.com ka bërë një shkrim për një tender të Bashkisë së Tiranës i cili ishte zhvilluar me të njëjtën mënyrë, pra pa garë dhe kompania fituese ishte po e njëjta, “GERTI – 1987”.
Gijotina.com
Discussion about this post