Kriza në tregjet ndërkombëtare po pasqyrohet dhe në Shqipëri ku volumi i mallrave të ngarkuara/ të shkarkuara në porte për periudhën Janar-Shkurt 2022 ka rënë me 9,2% krahasuar me të njëjtën periudhë të vitit të kaluar sipas INSTAT.
Lufta në Ukrainë dhe shtrenjtimi i naftës ka sjellë rënien e tregtisë duke u pasqyruar edhe tek transporti hekurudhor që ka pasur një rënie drastike me 37,5% për dy muajt e parë të vitit në krahasim me periudhën Janar-Shkurt 2021.
Ndërkohë transporti ajror i mallrave është rritur me 14,7% duke kompensuar disi rënien e transportit të mallrave të ngarkuara dhe shkarkuara në porte për dy muajt e parë të vitit 2022.
Lajmi i mirë është rritja e numrit të pasagjerëve për dy muajt e parë të vitit në krahasim me periudhën Janar-Shkurt 2021. Të gjithë sektorët e transportit të udhëtarëve janë rritur ndjeshëm ku spikat numri i fluturimeve me një rritje prej 101 % krahasuar me Janar-Shkurt 2021. Numri i lartë i fluturimeve ka sjellë një rritje eksponenciale të pasagjerëve, gati trefish më e lartë në krahasim me Janar-Shkurt 2021. Praktikisht numri i pasagjerëve që kanë përdorur transportin ajror për dy muajt e parë të vitit 2022 është 466 mijë ose 193% më shumë.
Rritja e transportit të udhëtarëve i atribuohet lehtësimit të masave shtrënguese brenda dhe jashtë Shqipërisë ku disa vende kanë hequr kushtet e vaksinimit për të nxitur turizmin siç është Izraeli apo disa vende në Bashkimin Europian.
Megjithatë hekurudha nuk ngelet pas sepse transporti i pasagjerëve është rritur me 100% duke e krahasuar me periudhën Janar-Shkurt 2021. Rritje ka pasur edhe transporti detar i udhëtarëve me 32,9% për të njëjtën periudhë sipas INSTAT.
Importi i mallrave në vendin tonë ka hasur një rritje të përgjithshme të tyre në të gjitha llojet e transportit kryesisht atij ajror dhe rrugor. Në dymujorin e vitit 2022 importi i mallrave nga sektori detar u rrit me 29,8%, nga toka me 19,2% dhe nga ajri me 22,4% në krahasim me periudhën Janar-Shkurt 2021.
Ndërkohë importi i mallrave nga hekurudha ka rënie dramatike me 67,8% për dy muajt e parë të vitit 2022 duke e krahasuar me të njëjtën periudhë të vitit të kaluar. Një ndër shkaqet e rritjes së importit është edhe rritja e kërkesave për shkak të frikës nga pasojat e luftës në Ukrainë. Sipas ekspertëve, kërkesa e lartë për miellin dhe vajin sollën një rritje artificiale të çmimeve duke u shtuar dhe abuzimet e tregtarëve dhe mungesën e kontrolleve nga Autoriteti i Konkurrencës.
Discussion about this post