Një shqiptar është dënuar me 5 vjet burg nga autoritetet në Belgjikë, pasi dyshohet se ka tregtuar rreth 9 kg kokainë, ndërkohë që prokuroria belge kërkoi sekuestrimin e një shume prej rreth 468 mijë euro që dyshohet se janë përfituar prej tij si pasojë e shitjes së narkotikëve.
Shqiptari vetëquhej “shoku im” dhe ai çdo ditë kalonte me një biçikletë elektrike në qendrën e qytetit bregdetar Ostend.
Hetimet e policisë zbuluan se i dyshuari quhej në të vërtetë Klaudio X., një shqiptar që pretendonte të ishte grek.
Gjatë kontrollit në banesën e tij në Zeedijk në mes të shkurtit, hetuesit gjetën pothuajse 600 gram kokainë, një armë zjarri dhe 29,000 euro cash. Në garazhin e tij në Mariakerkelaan kishte edhe 2.2 kilogramë kokainë, një dyshek dhe gati 14 mijë euro cash.
Ai rrëfeu se prej tre vitesh merrej me tregtinë e kokainës në shkallë të gjerë dhe se kishte mbajtur edhe llogari për këtë.
“Unë kam 100 klientë dhe kam pasur një fitim prej 300,000 eurosh,” tha ai kur u pyet se çfarë kishte përfituar nga shitja e drogës.
Prokuroria publike ka llogaritur se shqiptari Klaudio X, ka shitur të paktën nëntë kilogramë kokainë dhe ka kërkuar konfiskimin e 468 mijë eurove.
Për këtë rast është akuzuar edhe një shqiptar tjetër, 27 vjeç. Gjatë kontrollit në banesë ka qenë i pranishëm K. A.
Ai ka deklaruar se u sillte klientëve kokainë për Klaudio X, dhe qëndronte në banesë prej rreth tre muajsh. Në dhomën e tij u gjetën më shumë se 600 gramë pluhur të bardhë.
Klaudio X, u dënua nga Gjykata me 5 vjet burg, si dhe konfiskimin e 300 mijë euro. “Ai u soll si një udhëheqës i përsosur biznesi,” tha gjykatësi.
Ndërkohë shqiptari tjetër, K. A shpëtoi me një dënim 18 muaj burg me kusht.
Discussion about this post