Nga tritoli i vendosur tek banesa e kreut të Federatës Shqiptare të Futbollit Armand Duka, ka vetëm dëme materiale. Policia bën me dije se ngjarja ndodhi mbrëmjen e sotme rreth orës 22:10, në lagjen nr. 4, Durrës, para portës së Dukës. Si pasojë e shpërthimit janë shkaktuar vetëm dëme materiale në portën e jashtme të banesës.
Grupi hetimor ndodhet në vendngjarje dhe po punon për sqarimin e rrethanave të ngjarjes.
Kreu i Federatës Shqiptare të Futbollit Armand Duka ka reaguar lidhur me ngjarjen. Ai i është përgjigjur deklaratës së Erion Velajt, i cili pasi mori lajmin e tritolit është shprehur se kjo është një nga filmat e Dukës. Kreu i FSHF shprehet se këtu nuk kanë lidhje skenat e filmave. “Këta nuk lënë krim pa u zbuluar.Po ç’lidhje ka more, çfarë filmash”, ka thënë ai.
Ai tregon se nga shpërthimi nuk ka patur të lënduar ku ishin djali dhe bashkëshortja. Shpërthimi sipas tiij ka qenë i fuqishëm dhe nga pamjet paraprake filmike është identifikuar autori.
“E ka dëgjuar i gjithë Durrësi, vunë dinamit te dera e shtëpisë. Në banesë ishin djali dhe gruaja, unë sapo erdha. Nuk e di, uroj që të jetë rastësi. Fatmirësisht, nuk ka dëmtime në njerëz, porta është goxha larg nga banesa. Kamerat e hyrjes i kanë filmimet, duket një njeri me kapuç që afrohet te porta dhe vë dinamitin te mekanizmi që hap e mbyll portën”, tha Duka për mediat.
Discussion about this post