Rreth 100 gram tritol i lidhur me fitilzjarrpërcjellës u përdor për sulmin ndaj bizneseve të reperit Rigels Rajku të njohur me emrin e artit Noizy, në Durrës. Lidhur me ngjarjen bëhet me dije se asnjë person nuk është i ndaluar për ngjarjen, ndërsa vetë këngëtari ka deklaruar në polici se nuk do të akuzojë askënd pa fakte e prova.
Gjithashtu bëhet e ditur se autorët e tritolvënies në dy biznese në Durrës të Noizyt u filmuan nga kamerat e sigurisë, por ende asnjë person nuk është në pranga. Grupi hetimor mësohet se ka në dorë disa pamje, ku shfaqen të paktën dy të dyshuar për ngjarjen e mëngjesit të së mërkurës, 8 qershor 2022, të cilat po verifikohen për identifikimin e tyre.
Për këtë ngjarje është angazhuar komisariati i Policisë së Durrësit, e më konkretisht Sektori i Krimeve të Rënda.
Ndërkohë, ekspertët kanë arritur në përfundimin se për shpërthimin u përdorën 100 gram tritol i lidhur me kapsollë e fitilzjarrpërcjellës. Lënda plasëse me pas është hedhur mbi qepenin e lokalit butik “Illyrian”, në katin e parë të godinës, që sipas policisë ishte marrë me qira nga babai i këngëtarit, Bashkim Rajku. Shpërthimi shkatërroi dyqanin dhe shkaktoi dëme edhe në lokalin “Rigels Shisha Lounge” në katin e dytë dhe disa objekte aty pranë.
Nga ana tjetër, hetimet mësohet se janë shtrirë në disa pista ku kryesore mbetet ajo e konflikteve të këngëtarit Noizy. Kjo pistë përforcohet nga fakti se sulmi ndodhi vetëm dy ditë pas një përplasje të fortë mes tij dhe reperit tjetër Klevio Ahmetaj.
Në dëshminë para grupit hetimor Noizi mësohet se ka deklaruar se ai ishte në gjumë në kohën e shpërthimit dhe nuk mund të akuzojë askënd pa fakte. Këngëtari ka mohuar të ketë konflikte të tjera veç atij me Cllevion, ngjarje për të cilën po hetohet në gjendje të lirë.
Gjithashtu, edhe reperi Klevio Ahmetaj dhe anëtarë të grupit të tij kanë mohuar përfshirjen në sulmin me tritol ndaj Noizit.
Po kështu mësohet e është pyetur edhe reperi i dëmtuar, i cili ka qëndruar në pozita mohuese. Grupi i Cllevios nuk e ka marrë përsipër shpërthimin dhe nga hetimi i deritanishëm nuk ka ende asnjë të ndaluar.
Së fundmi, ngjarja deri më tani mbetet pa autorë.
Discussion about this post