Partia Demokratike ka reaguar për ngjarjen që tronditi Shkodrën mëngjesin e sotëm, ku një sasi eksplozivi u vendos në pronën e ish-kandidatit të PD për Shkodrën, Xhemal Bushatit.
Në një reagim për mediat, PD dënon sulmin duke theksuar se gjendja e sigurisë në Shkodër ka vetëm përkeqësim për shkak të aleancës së qeverisë me krimin, ndërsa shkruan se në të njëjtën godinë ka qenë dhe familja e Bushatit, por fatmirësisht jashtë rrezikut për jetën.
“Partia Demokratike dënon me ashpërsi sulmin me eksploziv ndaj pronës së kandidatit demokrat për bashkinë e Shkodrës Xhemal Bushati. Për fat të mirë, familja e zotit Bushati, që banon në të njëjtën godinë, nuk ka lëndime fizike, por ngjarja është tronditëse për ta dhe për qytetarët e Shkodrës. Për fat të keq, gjendja e sigurisë në Shkodër ka vetëm përkeqësim për shkak të aleancës së qeverisë me krimin. Partia Demokratike u kërkon organeve ligjzbatuese të zbulojnë përgjegjësit e këtij agresioni, që prek drejtpërsëdrejti zotin Xhemal Bushati, një nga personalitetet më të respektuar të qytetit të Shkodrës”, shkruan PD.
Dy shpërthime tritoli tronditën Shkodrën në orët e para të ditës së sotme. Shpërthimet ndodhën në dy godina të ndryshme, ku njëra prej tyre është në pronësi të kandidatit të PD-së për bashkinë e Shkodrës, Xhemal Bushatit.
Discussion about this post