Gjykata caktoi masën e sigurisë “arrest me burg” për shtetasin Edmond Arapi, i dyshuar se urdhëroi dhe financoi vendosjen e tritolit në ambjentet e fasonërisë në pronësi të një biznesmeni italian.
Ndërkohë ndaj 16-vjeçarit Arnold V., i cili dyshohet se vendosi sasinë e tritolit tek dera e fasonërisë, i është caktuar masa e sigurisë “arrest në shtëpi” për shkak të moshës së mitur.
“Nuk e kam njohur as takuar kurrë biznesmenin Italian. Nuk kam asnjë konflikt me të. Unë punoj prej disa kohësh në një gurore në Himarë. Qëndroj një pjesë të kohës atje për të siguruar të ardhura për familjen. As djalin (Arnold V.) nuk e njoh as se kam takuar ndonjëherë. S’jam i përfshirë në këtë ngjarje”, ka thënë Edmond Arapi.
Nga raportimet, mësohet se shkak i konfliktit mes biznesmenit italian dhe Arapit është bërë një gjobë e papaguar prej 100 mijë euro.
Edmond Arapi e kishte kërcënuar biznesmenin italian duke i thënë se nëse nuk i jepte paratë do e pësonte keq.
Pas refuzimeve të këtij të fundit, Arapi ka organizuar vendosjen e tritolit duke pajtuar një 16-vjeçar. Ai e ka porositur atë të vjedhë një biçikletë dhe i ka dhënë sasinë e tritolit që do vendoste në objekt.
Në këmbim ai do të merrte 1 milion lekë të vjetra. Pasi ka vendosur tritolin, 16-vjeçari është larguar me biçikletë nga vendi i ngjarjes.
Përgjatë këtyre ditëve ai ka qëndruar i fshehur në Valias. Nga ana tjetër, porositësi Edmond Arapi është kapur në Himarë.
Discussion about this post