Deputeti i Partisë Demokratike, Xhelal Mziu, ka reaguar pas shpërthimit të ndodhur në banesën e tij në Kamëz, duke e cilësuar ngjarjen si një akt me prapavijë politike. Përmes një deklarate për mediat, Mziu hodhi poshtë çdo mundësi konflikti personal apo borxhi dhe theksoi se ngjarja është një mesazh i drejtpërdrejtë ndaj tij dhe opozitës.
“Mbrëmë rreth orës 00:55 pranë shtëpisë sime pati një shpërthim që fatmirësisht nuk pati dëme në njerëz,” tha Mziu. Ai shtoi se shpërthimi shkaktoi dëme materiale, por është i gëzuar që nuk pati pasoja në njerëz, as tek ai, as tek familja, dhe as tek kalimtarët.
Mziu ishte i prerë në deklaratën e tij, duke e lidhur ngjarjen drejtpërdrejt me aktivitetin e tij politik. “Nuk kam asnjë lloj konflikti me asnjë person gjatë gjithë karrierës sime. Nuk kam asnjë borxh ndaj askujt. Unë e shoh një akt absolutisht politik,” theksoi deputeti. Sipas tij, shpërthimi është një “sinjal” që synon të frikësojë opozitën dhe ta detyrojë të mos reagojë ndaj asaj që ai e cilësoi si “qeveri krimi e korrupsioni.”
“Përveçse një hakmarrje politike, nuk e konsideroj gjë tjetër. Gjatë këtyre orëve, nuk gjejmë dot argument tjetër përveçse sinjalit për të na bërë një ushtar ndoshta të tyre dhe jo për të qenë një opozitë siç duhet,” tha ai.
Discussion about this post