Aksident tragjik në Austri, futbollisti i Kosovës sheh kushëririn e tij teksa përplaset për vdekje

Valon Berisha ka kaluar një moment tragjik, pasi kushëriri i tij humbi jetën në një aksident të tmerrshëm rrugor në Austri.

Mesfushori i Zurich ishte në makinën që ndodhej përpara automjetit të përfshirë në aksident dhe ishte dëshmitar okular i ngjarjes fatale.

Aksidenti ka ndodhur të dielën në mëngjes, kushëriri i Berishës po udhëtonte me një furgon në Westautobahn. Automjeti ka dalë nga rruga dhe është përplasur ballë për ballë me një barrierë druri.

Berisha, i cili po udhëtonte përpara, pa tragjedinë në pasqyrën e tij të pasme dhe u ndal menjëherë për të ofruar ndihmën e parë, së bashku me disa të tjerë. Pavarësisht përpjekjeve të ekipit të urgjencës, 38-vjeçari u shpall i vdekur në vendngjarje.

Përmes një deklarate, klubi i Zurich u shpreh i tronditur nga lajmi, duke thënë: “FC Zurich është thellësisht i tronditur nga aksidenti tragjik në Austri, në të cilin humbi jetën një i afërm i ngushtë i lojtarit tonë Valon Berishë. Valon nuk ishte i përfshirë drejtpërdrejt në aksident, por ishte dëshmitar i drejtpërdrejtë i ngjarjes.”

Klubi shprehu mbështetje të plotë për lojtarin, duke theksuar se ata janë pranë tij në këtë moment të vështirë dhe do ta mbështesin në çdo mënyrë.

gijotina.com/