Laçi është tronditur mëngjesin e së hënës nga një atentat me armë zjarri ku mbeti i vrarë ish efektivi i policisë Xhelal Reçi. Ngjarja e rëndë ndodhi rreth orës 07:23 pranë lokalet të Xhelal Reçit.
Menjëherë pas ngjarjes policia ka ngritur postoblloqe në të gjithë zonën me qëllim ndalim e autorëve të ngjarjes së rëndë. Paraprakisht dyshohet se autorët e kanë ndjekur Xhelal Reçin prej disa ditësh duke studiuar të gjitha lëvizjet e tij.
Ngjarja ka ndodhur pranë komisariatit të policisë dhe në zonë ka shumë kamera sigurie të cilat pritet të ndihmojnë në zbardhjen e ngjarjes dhe identifikimin e autorëve.
Pas ngjarjes policia ka gjetur një mjet tip ‘Toyota’ të djegur, i cili mendohet se është i autorëve.
Në ndihmë të Policisë lokale janë edhe grupet e FNSH-së dhe një grup i posaçëm hetimor për të bërë të mundur zbardhjen e plotë të rrethanave të ngjarjes.
Djali i Xhelal Reçit po ashtu ka rënë pre e një atentati në vitin 2020. Besnik Reçit i është bërë atentat teksa ishte në makinë bashkë me familjen e tij, bashkëshorten dhe dy fëmijët e mitur, kur u qëllua nga dy persona që lëviznin me motor. Asnjëri prej tyre nuk u plagos ndërkohë që autorët e ngjarjes ende nuk janë kapur nga policia.
