Një ngjarje e rëndë ka ndodhur në Tropojë, ku një 46-vjeçar ka rënë pre e një prite nga dy persona të armatosur dhe me maska.
Bëhet fjalë për 46-vjeçarin Kastriot Abazi, banues në Selimaj Geghysen në Tropojë, i cili mësohet se ka qenë duke shkuar në shtëpi me makinën e tij, kur rrugës i kanë dalë dy persona me maska. Ngjarja mësohet se ka ndodhur rreth orës 21:00 të datës 27 korrik, por ajo është mbajtur e fshehtë nga organet e policisë.
Në ato momente, 46-vjeçari Abazi ka ndaluar makinën, por menjëherë, dy personat e maskuar e kanë sulmuar me thika. Gjatë përleshjes, ai ka marrë plagë të ndryshme në gjymtyrë, por ka arritur t’u shpëtojë nga duart atentatorëve dhe është larguar me shpejtësi nga vendi i ngjarjes.
Ai është paraqitur menjëherë në spital, ku ka marrë mjekimet e nevojshme, ndërkohë që ndodhet jashtë rrezikut për jetën. Kastriot Abazi rezulton se është i martuar dhe baba i tre fëmijëve. Dyshimet e tij për këtë ngjarje lidhen me hasmëri, ndërkohë që ende nuk ka asnjë të arrestuar për këtë atentat.
