Një gjykatëse federale në Washington, tha sot se ish-presidenti Donald Trump duhet ta rregullojë fushatën e tij presidenciale 2024, për të përshtatur datat e gjyqit.
Gjyqtarja Tanya Chutkan nuk ka caktuar ende datën e procesit gjyqësor për çështjen në të cilën Trump akuzohet se ka tentuar të ndryshojë rezultatet e zgjedhjeve të vitit 2020, një nga katër rastet kundër ish-presidentit, transmeton Telegrafi.
Prokurori special Jack Smith propozoi që gjyqi të fillojë më 2 janar 2024, njëmbëdhjetë muaj para zgjedhjeve, e avokatët e Trump i kërkuan Chutkan që të shtyjë gjyqin deri në prill 2026.
Në anën tjetër, Chutkan tha se asnjë nga ato data nuk është e pranueshme.
“Trump do të duhet të shkojë në gjyq pavarësisht nga programi i tij”, tha gjykatësja, duke shtuar se angazhimet e tij nuk duhet të ndikojnë në datën e gjykimit.
Trump i konsideron të katër rastet përpjekje politike për të parandaluar rikthimin e tij në pushtet.
Ai është deklaruar i pafajshëm në tre raste dhe pritet të deklarohet i pafajshëm në të katërtin kur të dalë në gjyq në Geogria më 6 shtator.
Trump ka thënë më parë se Chutkan është e njëanshme dhe ka diçka kundër tij.
Katër proceset e ardhshme gjyqësore paraqesin vështirësi të mëdha logjistike për Trump ndërsa ai përpiqet të kthehet në Shtëpinë e Bardhë.
Discussion about this post