Presidenti amerikan, Donald Trump tha se është “i mërzitur” me presidentin rus Vladimir Putin dhe se mund të vendoste tarifa shtesë për naftën ruse nëse Putini nuk bashkëpunonte në negociatat në vazhdim – për t’i dhënë fund luftës së tij në Ukrainë, sipas CNN.
“Isha shumë i zemëruar – i inatosur – kur Putini filloi të diskutonte gjerësisht besueshmërinë e Zelensky – pasi kjo nuk të çon në vendin e duhur, e kuptoni?”, tha Trump në një intervistë telefonike për “NBC News”.
Trump iu referua Putinit – i cili së fundmi ka diskutuar nevojën për udhëheqje të re në Ukrainë.
“Por, një lidership i ri – do të thotë se nuk do të ketë një marrëveshje për një kohë të gjatë, apo jo?”, tha Trump.
Presidenti amerikan paralajmëroi se dështimi për të arritur një marrëveshje mund të rezultonte në tarifa dytësore.
“Nëse Rusia dhe unë nuk jemi në gjendje të bëjmë një marrëveshje për ndalimin e gjakderdhjes në Ukrainë, dhe nëse mendoj se ishte faji i Rusisë – që mund të mos jetë – por nëse mendoj se ishte faji i Rusisë, unë do të vendos tarifa dytësore për naftën, për të gjithë naftën që del nga Rusia”, tha ai.
I pyetur nëse ai do të bisedonte me Putinin, këtë javë – nëse udhëheqësi rus do të bënte gjënë e duhur, Trump tha: “Po. Putini është i vetëdijshëm se jam i zemëruar”.
Toni i ashpër dhe kritik i Trump është në kontrast të plotë me fjalët e tij për presidentin ukrainas, Volodymyr Zelensky dhe thirrjet e tij për zgjedhje për vendin e shkatërruar nga lufta.
Discussion about this post