Donald Tramp ishte i bindur se do i ulte shumë shpejt bashkë një tryezë, Vladimir Putinin dhe Volodimir Zelenskin, veçanërisht pas takimit që pati në Alaskë me shefin e Kremlinit. Megjithatë dy javë pas këtij takimi, kjo bindje i është shuar thuajse fare siç tregon në një intervistë për portalin me pikëpamje konservatore të djathta “Daily Caller”.
“Një takim trepalësh mund të bëhet. Dypalësh nuk e di, por trepalësh po, vetëm se ndonjëherë njerëzit nuk janë gati. Është si të kesh një fëmijë në një shesh lojërash dhe aty vjen një tjetër. Grinden, grinden, ti do t’i ndash, ata vazhdojnë dhe pas pak kohe ata ndalen vetë të lumtur. Kështu është edhe në këtë rast. Ndoshta ata duan të luftojnë edhe pak më shumë – luftë me budallallëk, por kjo po zgjat shumë. Kanë vdekur shumë njerëz.”
Tramp refuzoi kategorikisht të dërgojë trupa ushtarake amerikane në Ukrainë, siç po planifikojnë të bëjnë disa aleatë europianë të NATO-s. Shefi i Shtëpisë së Bardhë sqaroi se nuk do të ndihmojë drejtpërdrejt me armatime Ukrainën, siç ka bërë administrata pararendëse. Armatimet do ia shesë përmes vendeve të NATO-s që do ua blejnë amerikanëve.
Ndërkaq, në një analizë të një tjetër portali me famë, “Axios”, thuhet se në rangjet e larta të adminsitratës amerikane ka zyrtarë që besojnë se vendet europiane po bëjnë një lojë të dyfishtë me Ukrainën. Nga njëra anë, mbështesin përpjekjet e paqes të presidentit Tramp, por njëherësh punojnë për vendosjen e sanksioneve ndaj Rusisë që minon këto përpjekje. E madje ka edhe nga ata zyrtarë europianë që përpiqen të gjejnë mënyra që kostot e luftës në Ukrainë t’ua ngarkojnë sërish Shteteve të Bashkuara.
Discussion about this post