Trump: Të hetohen pagesat që Kamala Harris u ka bërë yjeve të skenës gjatë fushatës

Presidenti i SHBA, Donald Trump, njoftoi të hënën se dëshiron të nisë një “hetim të madh” mbi mbështetjen që ish-kundërshtarja e tij presidenciale Kamala Harris mori nga personazhet e famshëm, duke i hedhur benzinë ​​zjarrit në përballjen që filloi javën e kaluar me këngëtarin e famshëm të rokut Bruce Springsteen.

“Sa para i pagoi Kamala Harris Bruce Springsteen për performancën e tij të dobët gjatë fushatës së saj presidenciale?”. pyeti Trump në një postim në Truth Social, i cili u bë me shkronja të mëdha, duke iu referuar paraqitjes së këngëtarit të famshëm në një tubim fushate të Harris në shtetin e Xhorxhias disa javë para zgjedhjeve presidenciale.

“Kandidatët nuk lejohen të paguajnë për donacionet (që marrin), gjë që e bëri Kamala, duke u shtirur sikur paguan për argëtim. Për më tepër, ishte një përpjekje shumë e kushtueshme dhe e dëshpëruar për të rritur artificialisht turmat e vogla, që ajo po tërhiqte në tubimet e saj të fushatës”, shkroi Trump në Truth Social.

“Do të kërkoj një hetim të plotë për çështjen”, theksoi presidenti amerikan.

Gjatë fushatës së saj zgjedhore të vitit 2024, Harris kërkoi në mbështetjen e yjeve të mëdhenj të muzikës dhe televizionit, si Beyonce dhe Oprah Winfrey.

Winfrey ka mohuar tashmë se kompania e saj e prodhimit ka marrë 1 milion dollarë nga ekipi i fushatës së ish-zëvendëspresidentes amerikane. Për më tepër, ekipi i Harris ka mohuar thashethemet se ajo e pagoi Beyonce-n për t’u shfaqur në një aktivitet fushate.

Javën e kaluar, Trump e sulmoi ashpër Springsteen, duke thënë se “nuk më ka pëlqyer kurrë, kurrë nuk më ka pëlqyer muzika e tij apo politikat e tij ekstremiste të majta ” dhe e quajti këngëtarin një “idiot” pas komenteve që bëri gjatë një koncerti në Mançester të Anglisë.

“Atdheu im, Amerika që dua, Amerika për të cilën kam shkruar, e cila ka qenë një dritë shprese dhe lirie për 250 vjet, është aktualisht në duart e një qeverie të korruptuar, të paaftë dhe të pabesë”, u shpreh Springsteen në koncert, duke i kërkuar publikut të “ngrinte zërin kundër autoritarizmit dhe ta linte lirinë të triumfonte”.