Kreu i Agjencisë Qendrore të Inteligjencës amerikane ka konfirmuar se Shtetet e Bashkuara kanë ndalur ndarjen e inteligjencës me Ukrainën. Lajmi është bërë publik nga shefi i CIA-s, John Ratcliffe, një ditë pasi presidenti Donald Trump pezulloi ndihmat ushtarake për Kievin.
Ratcliffe, u pyet gjatë një interviste në FoxNews lidhur me deklaratat e presidentit polak Andrzej Duda, i cili tha se SHBA ka ndërprerë ndarjen e informacioneve të klasifikuara me Ukrainën.
Ratcliffe sqaroi se presidenti Donald Trump kërkoi të testojë përkushtimin e presidentit ukrainas Volodymyr Zelensky ndaj procesit të paqes. “Ju kujtoj se Trump tha: ‘Le të ndalojmë dhe t’i japim një mundësi për të reflektuar’. Dhe përgjigja e Zelenskyt erdhi shpejt, duke deklaruar se ai është i gatshëm për paqe”, tha Ratcliffe.
Ai shtoi se me këtë zhvillim, pauza e vendosur për ndihmën ushtarake dhe ndarjen e inteligjencës mund të hiqet.
“Ne do të vazhdojmë të punojmë krah për krah me Ukrainën për të zmbrapsur agresionin”, u shpreh ai.
Ndërkohë, më vonë edhe Këshilltari i Sigurisë Kombëtare të SHBA-së, Mike Waltz, konfirmoi se Trump do të shqyrtojë mundësinë e rikthimit të ndihmës ushtarake nëse organizohen bisedime të mirëfillta paqeje dhe vendosen masa për ndërtimin e besimit mes palëve.
“Presidenti do të shqyrtojë heqjen e kësaj pauze nëse mund të përmbyllim këto negociata dhe të ecim përpara me hapa konkretë”, tha Waltz për “Fox News”.
Vendimi i Trump për të pezulluar ndihmën ushtarake dhe ndarjen e inteligjencës u mor pas një takimi të tensionuar me presidentin Zelensky në Zyrën Ovale javën e kaluar.
Discussion about this post