Pas vdekjes së tij, ditën e shtunë në Spitalin Universitar të Berlinit Charite, personeli mjekësor dhe të afërmit po merren me procedurat që mundësojnë sjelljen e trupit të ish-Presidentit në Shqipëri, ku do t’i bëhen edhe nderimet e fundit.
Nga informacionet e marra, mësohet se procedurat mund të përfundojnë gjatë ditës së hënë dhe po të hënën rreth mbrëmjes trupi i tij do të niset drejt Tiranës dhe do të mbërrijë gjatë ditës së martë. Ish-Presidenti do të përcillet për në banesën e fundit nëpërmjet një ceremonie zyrtare.
Këshilli i Ministrave pritet të marrë një vendim të posaçëm, për t’i bërë ish-kreut të shtetit nderimet e duhura.
Bujar Nishani ndërroi jetë teksa po kurohej në spitalin universitar Charite në Berlin, një ndër spitalet më të mira në Gjermani, por shëndeti i tij u përkeqësua për shkak të insuficiencës polmonare të theksuar, e cila solli dhe vdekjen e tij të shtunën.
Për ndarjen e tij nga jeta pati një numër të madh mesazhesh ngushëllimi, jo vetëm nga politika shqiptare, por edhe nga institucione të rajonit dhe ato ndërkombëtare.
Discussion about this post