Tsipras dorëheqjet si deputet i Syriza, ish-kryeministri grek premton vazhdimin e aktivitetit politik

Ish-kryeministri grek Alexis Tsipras njoftoi të hënën dorëheqjen si deputet i parlamentit, duke nxitur spekulimet se ai mund të jetë duke u përgatitur të nisë një lëvizje të re politike. Në një deklaratë pasi i paraqiti dorëheqjen kryetarit të Dhomës së Përfaqësuesve përpara sesionit të ri parlamentar, Tsipras tha se vendimi i tij u udhëhoq nga ndërgjegjja pas 16 vitesh në parlament, duke përfshirë periudhat si kryetar i SYRIZA-s, kryetar i opozitës dhe kryeministër.

“Nuk ishte as një vendim i lehtë dhe as i pamenduar. Unë jap dorëheqjen sepse nuk mundem dhe nuk dua të mbaj postin e deputetit, me të gjitha privilegjet e tij, kur ndiej se pjesëmarrja ime, veçanërisht në pozicionin e veçantë të ish-kryeministrit, nuk jep asnjë kontribut thelbësor tek ata që më besuan”, u shpreh Alexis Tsipras, Ish-kryeministër i Greqisë.

Ai kritikoi parlamentin aktual për paaftësinë për të kryer rolin e tij kushtetues.

“Nuk mundem dhe nuk dua të marr pjesë zyrtarisht në një parlament që, i dobësuar demokratisht, kryesisht për shkak të përgjegjësisë së shumicës, nuk arrin të përmbushë rolin që kërkon Kushtetuta dhe qytetarët”, theksoi Tsipras.

Tsipras theksoi se dorëheqja e tij nga parlamenti nuk do të thoshte një tërheqje nga politika, duke thënë se po heq dorë nga siguria e karrigeve parlamentare, duke u rikthyer tek angazhimi shoqëror. Duke iu drejtuar ish-kolegëve të tij të Syriza-s, Tsipras tha:

“Ne nuk do të jemi kundërshtarë. Dhe ndoshta së shpejti do të udhëtojmë përsëri së bashku drejt deteve më të bukura”, tha ai.

Gjatë fjalimit të tij, Tsipras bëri thirrje për veprim kolektiv për t’u përballur me sfidat me të cilat përballet Greqia, që sipas tij janë ekonomike, politike, gjeopolitike dhe mbi të gjitha morale. Alexis Tsipras, i cili udhëhoqi partinë e krahut të majtë Syriza, shërbeu si kryeministër nga viti 2015 deri në vitin 2019, duke e drejtuar Greqinë në kulmin e krizës së saj financiare. Mandati i tij përfundoi kur Syriza humbi pushtetin përballë Demokracisë së Re, e cila aktualisht qeveris në shtetin helen.