Tubimi për dorëheqjen e Veliajt/ Policia arreston protestuesit, procedohen përfaqësuesit e opozitës

Tre persona, pjesë e protestës së djeshme te Bashkia Tiranë, janë arrestuar nga policia e kryeqytetit. Dy 18-vjeçarë janë vënë në pranga për hedhjen e molotovëve,ndërsa një tjetër është arrestuar për ushtrim dhune ndaj punonjësve të policisë.

Katër janë proceduar në gjendje të lirë, mes tyre përfaqësuesit e opozitës Tedi Blushi dhe Klevis Balliu. Ndërsa tetë persona janë shpallur në kërkim.

“Pas përfundimit të protestës janë kryer veprimet procedurale, është këqyrur vendi i ngjarjes, ku janë sekuestruar në cilësinë e provës materiale objekte dhe sende të hedhura në drejtim të Bashkisë Tiranë, të cilat janë dërguar për ekspertime të mëtejshme kriminalistike. Për përdorim të lëndëve piroteknike (molotov) janë arrestuar në flagracë shtetasit K.V. (Kevin Vidrica), 18 vjeç, dhe B.M.,18 vjeç (Bernard Metaliaj)”, njoftoi policia.

“Gjithashtu po punohet për identifikimin dhe kapjen e dy shtetasve, të cilët kanë hedhur dhe kanë përdorur lëndë piroteknike (molotov). Për ushtrim dhune ndaj punonjësve të Policisë është arrestuar shtetasi F. K. (Franci Kaloshi) banues në Lushnjë. Janë proceduar ne gjendje të lirë shtetasit K.B. (Klevis Balliu), T.B. (Tedi Blushi), E.V. (Enri Vrenozi), D.B. (Dritan Bardhi). Po punohet për kapjen e shtetasve A.T. (Avni Tobli), R.D. ( Rubin Dashi), A.M. (Artan Muçmata), J.H. (Joni Hoxh), B.Z. (Besim Ziri), B.Gj. ( Besar Gjeçaj), E.P. (Erjon Prenga), dhe A.P. (Alfred Pëllumbi). Gjithashtu janë administruar pamjet filmike të protestës dhe vijon këqyrja e pamjeve për identifikimin e personave të tjerë të përfshirë në veprimtari kriminale”, shtuan të njëjtat burime.

Të premten, u zhvillua protesta e tretë para Bashkisë Tiranë pas arrestimeve të drejtorëve të Erion Veliajt lidhur me dosjen “5D”. Protestuesit kërkuan dorëheqjen e Veliajt dhe arrestimin e tij. Gjatë tubimit, u hodh molotov drejt bashkisë, ndërsa pati momente tensioni mes policisë dhe protestuesve, teksa këta të fundit kanë tentuar të heqin barrierat metalike që i ndanin nga muret e godinës së institucionit.

“Dhuna në protestë” u dënua njerëzi nga ambasadat kryesore në vend, ç’ka shkaktoi pakënaqësi te shumë qytetarë, të cilët e interpretuan mesazhin e selive diplomatike si mbrojtje ndaj zyrtarëve të korruptuar.