Kjo e Premte shënoi protestën e tretë para Bashkisë së Tiranës pas arrestimeve të drejtorëve të Erion Veliajt për dosjen e njohur si “5D”.
Me brohoritma, mesazhe në pankarta dhe deklarata nga mikrofoni i protestës, qytetarë, aktivistë dhe përfaqësues të opozitës kërkuan dorëheqjen e Erion Veliajt nga posti i kryetarit të Bashkisë së Tiranës dhe arrestimin e tij. Veliaj u cilësua përgjegjës për vjedhjet me tednera të drejtorëve të tij, si dhe për aferën e inceneratorit të Tiranës.
“Më datë 25 prill, ky individ (Veliaj) po planifikon të shkojë në Holandë, aty ku në fakt, është e regjistruar kompania mëmë e inceneratorit fantazmë të Tiranës, sepse ky individ, si pronar faktit i inceneratorit të Tiranës, ka lënë punë pa kryer që do t’i mbyllë më datë 25 prill. Në Holandë, së bashku me prestanomët e tij dhe hajdutët e tij që ka vendosur për të vjedhur taksat nga inceneratori”, tha Belind Këllëçi, anëtar i kryesisë së PD-së.
Nga mikrofoni i protestës, qytetarët dënuan dhe reagimet e kryebashkiakut lidhur me aferën “5D”, i cili, sipas tyre, po u thotë se pavarësisht vjedhjeve, “nuk keni çfarë më bëni”.
Protestuesit e shprehën revoltën edhe duke hedhur molotov drejt bashkisë. Flakët megjithatë u shuan shpejt nga efektivët e policisë të pajisur me mjete zjarrfikëse.
Këshilltarët e Bashkisë nuk u lejuan nga efektivët të futen në ambientet e bashkisë. Mes policisë dhe protestuesve pati tensione, teksa këta të fundit tentuan të hiqnin barrierën metalike të vendosur si masë e shtuar nga forcat e rendit.
Pjesë e protestës ishin dhe banorë të pallatit te rruga “Ferit Xhajko”, të cilëve bashkia u ka dërguar një shkresë disa ditë më parë, ku i njofton për shembjen e ndërtesës me argumentin se është dëmtuar nga tërmeti. Banorët e cilësojnë vendimin të padrejtë dhe shprehin se pallati po planifikohet të shembet që aty të ndërtojnë “klientët” e Veliajt.
Në mbyllje të tubimit, Adriana Kalaja nga PD njoftoi se të premten e javës së ardhshme do të protestohet sërish para bashkisë. Protestat, thanë përfaqësues të opozitës, do të jenë të vazhdueshme deri në dorëheqjen e Erion Veliajt.
Discussion about this post