Deputeti i Partisë Demokratike në qarkun e Fierit, Luan Baçi, ka akuzuar ditën e sotme kryetaren e Bashkisë së Patosit, se do ja japë një personi shumë të afërt shkollën, në mënyrë që ta kthejë në lokal. Sipas Baçit, edhe prindërit e nxënësve që studiojnë në Grizë të Patosit, kanë dalë kundër vendimit të Bashkisë, që fëmijët të zhvendosen në një shkollë tjetër pasi ajo ku ndodhen ka nevojë për punime. Prindërit kanë dalë në protestë prej dy ditësh madje kanë bllokuar dhe autobusin që erdhi sot për të marrë fëmijët dhe për t’i dërguar në shkollën në Grizë.
Pas denoncimit të deputetit të Partisë Demokratike, ka reaguar kryebashkiakia. Në një prononcim për mediat, ajo tha se ende nuk i ka “ikur truri” për të dhënë me qira një shkollë, e për ta shndërruar në lokal. Ndërsa kërkoi nga Baçi që të shkonte në Bashki dhe të merrte informacion.
“Po kush ka interes për të marrë lokal një godinë që kanë frikë njerëzit që të futen brenda sepse ka çarje muresh? As kryetares së Bashkisë nuk i ka ikur truri për të dhënë me qira biznesit. Zoti Baçi e ka shpikur, nuk e ka larg Patosin nga Fieri për të marrë gjithë informacionin që dëshiron. Se duhet të mbajë përgjegjësi për atë që thotë,”- është shprehur ajo.
