Presidenti Donald Trump fali të hënën ish-guvernatorin demokrat të Ilinoit Rod Blagojevich, i cili u dënua për korrupsion për përpjekjen për të shitur vendin e liruar të ish-Presidentit Barack Obama në Senatin amerikan.
Rod Blagojevich u shkarkua nga detyra në vitin 2009 pasi prokurorët thanë se ai u përpoq të shiste vendin e Senatit të liruar nga zoti Obama, pasi ai i fitoi zgjedhjet presidenciale të vitit 2008.
Duke folur në Shëpinë e Bardhë, ku nënshkroi vendimin për faljen, Presidenti Trump tha se Rod Blagojevich kishte përjetuar një “padrejtësi të tmerrshme”.
Presidenti Trump, gjatë mandatit të tij të parë, ia uli dënimin 14 vjeçar ish-guvernatorit Blagojevich. Zoti Blagojevich ishte shfaqur në emisionin televiziv të zotit Trump, “Celebrity Apprentice”, në vitin 2010 ndërsa ishte në pritje të gjyqit.
Gjykata e Lartë në vitin 2018 hodhi poshtë një apel të zotit Blagojevich për të ulur më tej dënimin e tij, i cili parashikohej të përfundonte në vitin 2026.
Rod Blagojevich është përpjekur ta paraqesë veten si viktimë e një ndjekjeje të tepruar dhe të motivuar politikisht nga forcat federale të ligjit, një akuzë që dukej se bëri jehonë tek Presidenti Trump./VOA
Discussion about this post