Detaje të reja kanë dalë në dritë nga ngjarja e djeshme ku u gjet i pajetë trupi i 37-vjeçares Leze Qosa në një kanal në afërsi të By Pass-it të Shkodrës. Mësohet se dyshimet e para të efektivëve se 37-vjeçarja kishte shenja dhune kanë rënë poshtë. Pas autopsisë në spitalin rajonal të Shkodrës rezulton se Leze Qosa ka disa hematoma të vogla, por që nuk janë ato që kanë shkaktuar vdekjen e saj.
Dy janë dyshimet që ka policia, ose nga një vetëhelmim i 37-vjeçares ose mund të jetë edhe një vdekje natyrale duke qenë se ishte larguar nga banesa ku jetonte me motrën e saj që nga data 8 maj e këtij viti.
Pas 10 ditësh nga largimi në mënyrë të papritur, motra e 37-vjeçare më 18 maj bëri një denoncim në policinë e Shkodrës. Ndër të tjera ajo deklaroi se Leze Qosa vuante nga depresioni dhe kjo mund të jetë një prej arsyeve qe ka çuar 37-vjeçaren në veprime të pakontrolluara.
Trupi i pajetë u gjet i dekompozuar dhe mendohet se ka rreth 5 ditë që ndodhej në kanalin në afërsi të By Pass-it të Shkodrës. Tashmë priten ardhja e analizave nga Tirana për të nxjerrë shkaqet e plota që çuan në humbjen e jetës të shtetases Leze Qosa nga Tropoja por që jetonte në lagjen Dobraç në Shkodër në një banesë me motrën e saj.
Discussion about this post