Alban Semaku i njohur edhe me emrin Elton Mermali, anëtari i bandës së Lushnjës, këtë të dielë u gjet pa shenja jetë në breg të lumit Shkumbin, i vrarë me plumba pas shpine.
Ndërkohë, burimet bëjnë më dije se ai është parë për herë të fundit 4 ditë më parë dhe nuk shoqërohej me persona të tjerë. Ndërsa, sipas dëshmive, ai është parë në një nga lokalet e qytetit të Lushnjës.
Alban Semaku, 38 vjeç, u identifikua nga e ëma në morgun e Elbasanit, disa orë pasi trupi i pajetë u gjet buzë Shkumbinit në lagjen Çezmë të Peqinit.
38-vjeçari siç tregojnë burimet, kishte në trup dy plagë të shkaktuara me armë zjarri, një pas shpine dhe një tjetër në brinjë. Dyshimet janë se ekzekutimi i Alban Semakut ka ndodhur diku tjetër, të paktën disa orë para se të gjendej mes plehrave në këtë zonë të banuar në Peqin. Por shkaqet dhe dinamika e krimit ende janë të paqarta.
Policia mësohet se ka sekuestruar pamje të kamerave të sigurisë në biznese përgjatë rrugës për të arritur në gjurmë të autorëve ende të panjohur.
Sipas uniformave blu ai është arrestuar disa herë. Fillimisht në vitin 2006 është ekstraduar nga Italia, pas një vendimi të gjykatës së Lushnjes, pasi ishte dënuar për vrasje, si pjesë e një grupi kriminal.
Disa vite më vonë, në 2015, Semaku është arrestuar në flagrancë, pasi në lagjen “Gafurr Muço”, Lushnjë, për motive të dobëta, ka kanosur për jetën, me armë zjarri, shtetasin M. T. Gjithashtu, në nëntor të 2015 është dënuar me 6 vjet e 8 muaj burg për veprat penale “Prodhimi dhe shitja e lëndëve narkotike”, “Prodhim dhe mbajtje pa leje e armëve luftarake” dhe “Kanosja”. Ndërsa, në maj të këtij viti Semaku ka lënë qelinë e burgut të Peqinit ku ka vuajtur dënimin.
Grupi hetimor po punon për zbardhjen e ngjarjes, ndërsa pista e hetimit është ajo e larjes së hesapeve ose prishjes së pazareve.
