Komisioni Disiplinor i Lëvizjes Vetëvendosje ka përjashtuar nga partia asamblistin Besnik Mujeci, i cili u arrestua gjatë ditës së sotme në Shqipëri, i cili bashkë me katër persona tjerë janë kapur në Tiranë duke trafikuar substanca narkotike.
Vendimin e ka bërë të ditur Sekretari Organizativ i Lëvizjes Vetëvendosje, Alim Rama, i cili ka thënë se “pas marrjes së informacionit për arrestimin e asamblistit të Komunës së Prishtinës nga radhët e subjektit tonë, Komisionin Disiplinor i LVV menjëherë ka trajtuar këtë rast”.
“Si rrjedhojë Komisioni Disiplinor i Lëvizjes VETËVENDOSJE! në mbledhjen e tij mori vendim për përjashtimin e anëtarit Besnik Mujeci nga anëtarësia dhe të gjitha strukturat e Lëvizjes VETËVENDOSJE!”, ka shkruar Rama në një postim në Facebook.
Më tej ai ka shkruar se “Lëvizja VETËVENDOSJE! mbetet e përkushtuar që dukuritë e tilla të dënueshme dhe kundërligjshme, janë absolutisht të patolerueshme dhe do të luftohen e ndëshkohen”.
Drejtori i Drejtorisë Vendore të Policisë Tiranë ka dhënë detaje për operacionin e koduar “Punisher 2”, në kuadër të të cilit u godit një grup kriminal që trafikonte nga Kosova në Shqipëri dhe shpërndante lëndë narkotike ekstazi.
Në pranga ranë pesë persona, dy prej të cilëve shqiptarë të Kosovës ndërsa u sekuestruan 11,300 tableta ekstazi MDMA me peshë 5.093 kg dhe vlerë tregu rreth 400 mijë euro. Shtetasit e arrestuar janë lokalizuar në kryqëzimin e rrugës “Myslym Shyri” dhe “Sami Frashëri”, së bashku me dërgesën e drogës.
Të arrestuarit janë Mithat Ramadani 30 vjeç, banues në Prishtinë; Besnik Mujeci, 40 vjeç, banues në Prishtinë; Kalem Picari, 24 vjeç, banues në Tiranë; Ambra Myftari 28 vjeçe, banues në Tiranë; dhe Daniel Avdija 26 vjeç, banues në Tiranë.
Discussion about this post