Prokuroria e Durrësit shpall moskompetencë, SPAK merr në dorë hetimin për Selim Çekajn.
Sasia e drogës u sekuestrua mëngjesin e së mërkurës rreth orës 02:00 në portin e Durrësit teksa ishte porositur nga kompania “Ecoalmax” e Çekajt që ndodhet në Maminas. Gjatë aksionit, policia ka mundur të gjejë 49 kg në kontejnerin e administruar nga 72-vjeçari, e cila ishte ndarë në 31 pako të formave të ndryshme dhe ishte mbështjellë me letër natriban të lyera me graso. Ashtu si edhe i biri, Selim Çekaj tashmë në rolin e porositësit, dyshohet të ketë ndjekur të njëjtën rrugë dhe skemë për të fshehur kokainën, pasi sasia e drogës është gjetur e fshehur në shtyllat anësore të kontejnerit, në një ndarje me hapje të veçantë. Nisur nga të dhënat e mësipërme, rezulton se Arbër dhe Selim Çekaj babë e bir duket se kanë ndjekur gjithashtu të njëjtën linjë trafiku, me të njëjtin lloj të drogës, banane në kontejner, ndërsa ndryshon vetëm emri i kompanisë, nga “Arbri Garden” në “Ecoalmax”.
