Besnik Mujeci është një nga 5 të arrestuarit gjatë një operacioni anti-drogë të Policisë së Tiranës, ku u bllokuan mbi 11 mijë ekstazi, që ishin trafikuar nga Kosova drejt Shqipërisë, ku edhe do të shiteshin. Droga e kapur ka një vlerë tregu rreth 400 mijë euro, ndërkohë që Policia e Tiranës, tha se vijon operacioni.
Mujeci është anëtar i Asamblesë së Vetëvendosjes në Komunën e Prishtinës. Ai njihet si një aktivist i Lëvizjes Vetëvendosje dhe në zgjedhjet e fundit për Asamble Komunale, Mujeci ka marrë 608 vota.
Ai njihet edhe për përplasje me ish-kryetarin e Komunës së Prishtinës Shpend Ahmeti. Madje ky i fundit e kishte ftuar Mujecin që të sqaroheshin jashtë sallës së Kuvendit.
Në vitin 2020, Mujeci ishte ndaluar nga Policia e Kosovës për prishje të rendit dhe qetësisë, ku ishte gjobitur me 50 euro.
Besnik Mujeci ishte zgjedhur tre herë radhazi asamblist i VV-së në komunën e Prishtinës.
Në një prononcim për Portalin Dukagjini, Egzon Azemi nga VV, ka thënë se ende nuk kanë mundur ta konfirmojnë nëse bëhet fjalë për të dhe se janë duke tentuar ta konfirmojnë një gjë të tillë.
Azemi theksoi se nëse kjo gjë vërtetohet Mujeci do të përjashtohet menjherë nga Lëvizja Vetëvendosje.
“Nuk e kemi konfirmu ende, e kam parë këtë emër që po qarkullon në portale por nuk e di a është i njëjti, nuk munda ta kontaktoj Besnikun, do të tentojmë të kontaktojmë dhe ta kuptojmë për cfarë bëhet fjalë. Ende s’e kemi verifiku a është… Nëse është i vërtetë lajmi hapi i parë që do të bëjmë është ta përjashtojmë direkt nëse konfirmohet nëse është i arrestuar për këtë arsye”, ka thënë ai.
Discussion about this post