Ish-kryeministri Sali Berisha dhe pse është shpallur non-grata nga SHBA pasi u konsiderua se përmbante rrezik për sigurinë amerikane, ka ndarë një mesazh lidhur me 20-vjetorin e sulmit terrorist në Kullat Binjake.
Berisha shkruan në Facebook, se ai sulm ka ndryshuar SHBA-në dhe botën në këto dy dekada, dhe të përfshirët në ngjarje, morën ndëshkimin që merituan.
“Sot 20 vjetori i sulmit terrorist barbar të Al Quedes ndaj SHBA, në të cilin u goditën me avion Kullat Binjake në New York, ndërtesën e Pentagonit në Washington. Ky sulm mizor ndryshoi më shumë se çdo gjë SHBA dhe botën në këto dy dekada. Osama Bin Laden, dhe pas tij Al Bagdati, Sylejman Qazimi dhe qindra e mijëra anëtarë të fallangave të tyre morën nga SHBA ndëshkimin që meritonin”.
Ndër të tjera, ish-kryeministri tha se pas marrjes së pushtetit të talebanëve në Afganistan, bota nuk është më e sigurt, ndërsa shprehu nderim për viktimat e 11 shtatorit.
“Por përsëri sot veçanërisht pas fitores së talebanëve në Afganistan nuk mund të thuhet se bota është më e sigurt nga terrorizmi islamist. Sot është një ditë për të shprehur nderimin tonë të thellë për viktimat e 11 shtatorit, por edhe për të gjithë ata që ranë për t’u bërë të pavdekshëm kundër terrorizmit, për të bërë SHBA dhe botën një vend me të sigurt si dhe mbështetjen e plotë për luftën ndaj këtij armiku të egër të njerëzve të lirë në mbarë botën”, shkruan Berisha.
