U la në burg bashkë me dy rusët, ukrainasi kundërshton vendimin e gjykatës

Ukrainasi Fedir Alpatov, i cili u arrestuar disa ditë më parë në Gramsh bashkë me dy rusë, pas një incidenti në ish-Uzinën e Përpunimit të Armëve, ka ankimuar në Gjykatën e Apelit Durrës duke kundërshtuar masën “arrest me burg” të vendosur nga Gjykata e Elbasanit dhe kërkon lehtësimin e masës në “detyrim paraqitje”.

Gjykata e Elbasanit vendosi të lejë në burg më 24 gusht dy rusët dhe ukrainasin e arrestuar në Gramsh.

Referuar dosjes së prokurorisë dërguar gjykatës rezulton se më datë 20.08.2022, rreth orës 17:35, nga ana e punonjësve të shërbimit, rojeve ushtarake të Uzinës Mekanike Ushtarake Çekin, është njoftuar Salla Operative e Komisariatit të Policisë Gramsh, se në ambientet e rrethimit të brendshëm të këtij objekti, është futur një shtetas i huaj, i cili pasi është konstatuar nga roja e shërbimit, është larguar nga magazinat duke kaluar muret rrethuese të Uzinës.

Ky shtetas është ndjekur nga dy rojet e Uzinës dhe në distancë rreth 200 m, larg objektit, në momentin që ata janë afruar për ta ndaluar dhe shoqëruar këtë shtetas, ai ka bere rezistence dhe ka nxjerrë një spraj duke ua hedhur në fytyre dhe në trup, më qellim që të largohej nga ata.

Megjithatë këto veprime, rojet kanë bërë të mundur neutralizimin e tij dhe e kanë mbajtur të bllokuar deri në momentin që kanë ardhur shërbimet e Komisariatit të Policisë Gramsh, të cilët kanë bërë shoqërimin e tij në ambientet e këtij komisariati.

Nga veprimet e para ka rezultuar se shtetasi i huaj, i identifikuar si Mikhail Zorin, me shtetësi ruse, ka qenë i shoqëruar edhe nga dy persona të tjerë, të cilët udhëtonin me një mjet sportiv ngjyrë portokalli me vija të zeza, me targë AX6200IP.

Menjëherë janë organizuar shërbimet dhe janë vendosur pika kontrolli dhe është bërë e mundur kapja dhe shoqërimi i mjetit me targa AX6200IP, në të cilin ndodheshin shtetasi ukrainas Fedir Alpatov dhe shtetasja ruse Svetlana Timofeeva. Nga ana e shërbimeve të policisë është bërë shoqërimi i këtyre shtetasve në ambientet e Drejtorisë Vendore të Policisë Elbasan.

Nga ana e shërbimeve të policisë gjyqësore të Drejtorisë së Antiterrorit dhe Drejtorisë Vendore të Policisë Elbasan janë kryer veprimet e para hetimore, si pyetja e personave që kane dijeni për veprën penale, këqyrja e automjetit me të cilin udhëtonin dy prej shtetasve te huaj, sekuestrimi i sendeve dhe kryerja e vendimeve përkatëse te ekspertimit, për sendet e sekuestruara.