Opinioni publik në Shqipëri ditët e fundit është përfshirë në gjetjen e emrit të Presidentit të ri. Në media janë qarkulluar disa emra, ku një prej tyre ishte edhe ai i ish-kryeministrit të Kosovës, Ramush Haradinaj. Për këto zëra ka reaguar vet kreu i AAK-së, Ramush Haradinaj.
Me anë të një postimi në Facebook, Haradinaj ka mohuar zërat se mund të jetë emri i ri për President në Shqipëri. Ai i cilëson këto zëra si shpifje ordinere dhe se janë për hesap të “kuzhinave” që janë edhe kundër Shqipërisë, edhe kundër Kosovës, edhe kundër tij.
“Nuk jam kandidat për president të Shqipërisë. Po e shoh që po bëhet fushatë nga gazetarët e shitur, nga mercenarët e mediave, në Tiranë e në Prishtinë, sikur unë qenkam në kombinim për President të Republikës së Shqipërisë. Kjo është një shpifje ordinere, e ulët, e pistë dhe për hesap të kuzhinave që janë edhe kundër Shqipërisë, edhe kundër Kosovës, edhe kundër meje. Për popullin tim të dashur shqiptar, unë jam në Kosovë, do të jem në Kosovë dhe edhe politikisht do të realizohem në Kosovë. Shqipëria i ka njerëzit e saj, që di t’i vendosë në krye të shtetit. Me Kosovën e Shqipërinë e kundër matrapazëve mediatikë e të opinionit publik!” – shkruan Haradinaj në Facebook.
Discussion about this post