Dje policia doli me një njoftim zyrtar për avionin e rrëzuar në Vermosh, duke theksuar se brenda mjetit fluturues nuk kishte asnjë send të jashtëligjshme, sot banor i fshatit që pretendon se ka qenë dëshmitar ka treguar një tjetër version që bie në kontradiktë me hetimet për këtë rast. Personat të cilët pasi rrëzuan avionët dhe u larguan nuk janë identifikuar ende, ndërsa largimi i papritur i tyre nga vendi i ngjarjes, kthen hetimet paraprake atë të dyshimeve për një linjë trafiku të drogës nëpërmjet këtij mjeti fluturues. Megjithatë, kryeplaku i fshatit Vermosh, Prekë Vukaj, ndonëse pranon se një muaj më parë u gjet një parcelë me kanabis rreth 12 km larg nga vendi ku u rrëzua avioni.
Referuar dëshmisë, ngrihet dyshimi se nëse personat të cilët ishin brenda mjetit fluturues nuk do të kishin lidhje me hipotezën e linjës së trafikut të drogës nuk do të ishin larguar nga vendi i ngjarjes por do të prisnin trupat policore. Sakaq asnjëri prej tyre nuk është identifikuar ende, pas arratisjes me fouristradën që bariu i fshatit pretendon se janë larguar.
78-vjeçari, Kolë Vuçaj, që është personi i parë që shkoi tek avioni i rrëzuar për t’i dhënë ndihmë, duke menduar se ishte aksident ajror, ka tregon se si një person që ndodhej aty i ka bërë thirrje personit tri herë që të mos afrohet dhe të largohet nga aty në gjuhën shqipe. Fouristrada që ka marrë pilotin dhe pasagjerin, thotë bariu, ka qëndruar 45 minuta deri në një orë duke transportuar disa gjëra nga avioni te fouristrada, por nuk e di se çfarë po transportonin, për shkak se ndodhej në largësi dhe po i vëzhgonte me një dylbi, por pa arritur të identifikojë se çfarë po transportonin. Ai shton se në fshat kultivimi i kanabisit është i pamundur pasi banorët janë pleq e plaka dhe zona është drejt shpopullimit.
“Nuk dihet se kush janë ata persona që kanë qenë në avion dhe hipën në fouristradë. Nuk ma merr mendja, sepse në këtë zonë asnjëherë nuk është mbjellë. Të themi realitetin nuk ka as kush ta mbjellë drogën këtu, sepse kanë mbetur vetëm plaka e pleq, vetëm nëse vjen ndonjë jabanxhi dhe e mbjell. Është shpopulluar sepse kanë ikur njerëzit komplet nga këtu. Në male edhe mund të ketë, atë nuk e di. Unë për vete nuk dyshoj, se nuk ka vend për t’u mbjellë, sepse nuk ka tokë. Duhet të jenë dy-tre dynym të paktën, por është pyll komplet dhe aty në fushë është e kontrollueshme, por gjithsesi gjë pa u bërë nuk po lihet në ditët e sotme dhe asnjëherë nuk i dihet”, është shprehur ai.
Hipotezat për rrëzimin e avionit në zonën e Kelmendit dy ditë më parë kanë qenë të shumta dhe kryesorja lidhej me transportin e ndonjë ngarkese droge, nisur kjo edhe nga precedentët e mëparshëm në zonën e Divjakës e të Ishmit.
