Një ngjarje tragjike ka ndodhur natën e Krishtlindjeve në Itali. Në zonën e Foggias një mjet tip “Peugeot 2008″, me drejtuese një grua, përplasi për vdekje një fëmijë 8 vjeç me origjinë shqiptare, i identifikuar si Oriel Skura.
Mediat italiane kanë zbardhur detaje të reja se si ndodhi aksidenti tragjik dhe gjithashtu prindërit e vogëlushit të ndjerë kanë folur duke shprehur dhimbjen e tyre për humbjen e madhe.
Sipas rikonstruksionit të fakteve të siguruara nga kompania ‘Studio3A-Valore’ e cila ndjek ngjarjen në fjalë në emër të prindërve, kishte shkuar në Borgo Segezia për të festuar Krishtlindjet së bashku me disa të afërm. Pas drekës, rreth orës 15:00, të gjithë dolën nga shtëpia për t’u përshëndetur, duke qëndruar pjesërisht në oborr dhe pjesërisht buzë rrugës.
Megjithatë, Orieli tashmë kishte hipur në makinën e të atit, me një top në duar. Por një kushëri më i vogël e ka thirrur dhe ai ka dalë nga makina, por duke qëndruar gjithmonë në anën e rrugë.
Në atë moment, sipas asaj që mediat raportojnë, makina e ka përplasur të voglin. I mituri është hedhur nga makina disa metra larg dhe më pas u transportua me ambulancë në Poliklinikën e Foggia-s, por nuk mundi të mbijetojë.
“Orieli ishte dielli i shtëpisë dhe i familjes sonë, kishte një energji pozitive me të gjithë, përqafonte këdo që e trajtonte me përzemërsi dhe dashuri. Ishte një fëmijë shumë i lumtur dhe gjithmonë i buzëqeshur. I pëlqente të festonte, vallëzonte, këndonte, shijonte çdo moment të jetës së tij. Ka lënë një kujtim të bukur nga vetja kudo që shkonte, jashtë shtëpisë kishte pjekurinë e një të rrituri. Çdo ditë shkojmë në varreza, përballë në varr gjejmë gjithmonë njerëz që e vizitojnë dhe i bëjnë homazhe, miq të tij, shokë të klasës dhe shkollës si dhe prindërve të tyre”, deklarojnë nëna Merita dhe babai Olsi.
Gruaja që drejtonte makinën po hetohet për vrasje me automjet. Për zbardhjen e plotë të ngjarjes është marrë në hetim një kamera e instaluar të pranë vendit të ngjarjes.
Discussion about this post