Ditën e djeshme u propozua si kandidati për President i Republikës, Bajram Begaj ka reaguar sot për herë të parë për këtë çështje. Pak orë para votimit nga parlamenti ai në një interviste televizive ka thënë se ky është nga ato raste që fjalët nuk e përshkruajnë dot. Ai thekson se puna si mjek dhe si ushtarak e ka mësuar shumë se si të trajtojë atdheun dhe atdhetarët e tij. Prandaj ai ka thekuar që nëse zgjidhet si president kryefjala e punës do të jetë respekti për çdo qytetar pa asnjë dallim, nga personalitet tek më i thjeshti.
“Ishte sa e papritur aq edhe e madhe pesha e emocionit që ndjeva, kur mora lajmin se maxhoranca parlamentare kishte vendosur të më paraqiste si kandidat në seancën e sotme për zgjedhjen e Presidentit të Republikës.
Me mirënjohje të thellë dhe respektin më të lartë për bashkëpunëtort, kolegët, anëtarët e familjes së madhe të Forcave të Armatosura të Republikës, kam nënshkruar kërkesën për lirimin nga detyra e lartë që kam pasur deri më sot nderin e përgjegjësisë së Shefit të Shtabit të Përgjithshëm.
Fjalët nuk kanë qenë kurrë arma ime e më e fortë, por edhe sikur të ishin jam i bindur se do ta kisha të vështirë. t’i gjeja në këtë rast. Ky është një ndër ato raste që fjalët nuk e përshkruajnë dot. Vetëm përkushtimi me besnikëri absolute ndaj Republikës, qytetarëve dhe Kushtetutës së saj mund ta tregojnë sadopak madhësinë e këtij nderi. Puna ime si mjek dhe si ushtarak më ka mësuar shumë, por mbi të gjitha më ka mësuar vlerën e respektit për tjetrin dhe të dashurisë për Atdheun”, është shprehur ai. Kujtojmë se votimi për të do të mbahet sot pasdite në një seancë të posaçme parlamentare.
Discussion about this post