U thirr për çështjen “Partizani”, dalin detaje nga dëshmia e Genc Rulit në SPAK

Ish-ministri i Ekonomisë, Tregtisë dhe Energjitikës Genc Ruli është paraqitur sot në SPAK për të dëshmuar në lidhje me privatizimin e kompleksit “Partizani” në Tiranë.

Ndërkohë nga mediat bëhet me dije se Ruli është përgjigjur për mënyrën se si është privatizuar kompleksi dhe cilat janë procedurat që janë ndjekur.

Ish-ministri ka qëndruar për rreth 1 orë përballë prokurorëve të SPAK, të cilët janë duke hetur në lidhje me këtë çështje.

Pritet që SPAK të thërrasë edhe ish-ministrin e Mbrojtjes, Arben Imami dhe ish-shefin e Shtabit të Përgjithshëm, Xhemal Gjunkshi.

Kallëzimi për aferën e privatizimit të ish-kompleksit “Partizani”, ku është ndërtuar një kompleks pallatesh, është bërë nga kryetari i Grupit Parlamentar të Partisë Socialiste, Taulant Balla.

Nëpërmjet kësaj padie, Balla akuzon për shpërdorim detyre ish-kryeministrin Sali Berisha, dhëndrin e tij Jamarbër Malltezi dhe ish-ministrin Arben Imami.

Klubi sportiv “Partizani” ka qenë një ndër komplekset në pronësi të Ministrisë së Mbrojtjes.

Më herët, për këtë çështje është thirrur në Prokurorinë e Posaçme ish-drejtuesi i Komandës së Mbështetjes Logjistike të FA, Vladimir Qirjazi.

Po kështu, është thirrur në SPAK ish-ministri i Mbrojtjes, Gazmend Oketa.