Rreth 40 rrënjë ullinj janë djegur në fshatin Malinat në Berat, mesditën e sotme. Flakët janë shfaqur fillimisht në një prej parcelave, por të favorizuara nga era, ato janë përhapur në të gjithë pjesën kodrinore të fshatit duke djegur rreth 2 hektarë bimësi.
Zjarri ka përparuar me shpejtësi drejt parcelës me ullinj. Falë ndërhyrjes në kohë të forcave zjarrfikëse, flakët janë lokalizuar shpejt, ndërkohë që në zonë raportohet se ka ende shumë vatra të nxehta që po mbahen nën kontroll.
Për shkak të terrenit të vështirë kodrinor, futja e mjeteve zjarrfikëse në zonën e zjarrit ishte e pamundur dhe fikja u krye me mjete rrethanore, raporton policia.
Si pasojë e zjarrit njoftohet se është djegur një sipërfaqe rreth 2 ha me shkurre e ferra si dhe 40 pemë ullinj. Burime në vendngjarje bëjnë me dije se zjarri mund të jetë vendosur nga vetë banorët për të djegur mbeturinat, por era e ka nxjerrë jashtë kontrollit situatën.
Discussion about this post