Kryeministri i Kosovë Albin Kurti ka përkujtuar në 14-vjetorin e vdekjes, Ihor Kinal, një polic nga Ukraina që ka shërbyer gjatë luftës në Kosovë.
Kurti shkruan në Facebook se i riu shërbente si pjesë e UMNIK dhe jeta iu mor nga forcat serbe duke lënë pas familjen e tij.
“Sot u mbushën 14 vjet nga vdekja e Ihor Kinal. Ai ishte polic nga Ukraina që po shërbente në Kosovë. Një muaj pas shpalljes së pavarësisë së Republikës së Kosovës, Gjykata e Qarkut dhe ajo Komunale në veri të Mitrovicës u uzurpuan nga rreth 300 protestues të armatosur serbë. Për lirimin e këtyre objekteve, kishin ndërhyrë forcat ndërkombëtare të KFOR-it dhe të UNMIK-ut. Protestuesit që vinin nga radhët e strukturave ilegale të Serbisë, atë ditë kishin me vete armë dhe mjete të tjera shpërthyese me të cilat sulmuan policët. Ndër 88 ushtarakë e zyrtarë policorë, të KFOR-it e të UNMIK-ut, të cilët u plagosën apo lënduan ishte edhe polici i UNMIK-ut nga Ukraina, Ihor Kinal. Me 18 mars 2008, një ditë pas sulmit, 26-vjeçari ukrainas vdiq si pasojë e plagëve të rënda të marra me 17 mars. Ai la pas nënën, babain dhe motrën, dhe varri i tij sot ndodhet në afërsi të qytetit Ternopil, në një fshat në perëndim të Ukrainës. Në shkollën e tij të mesme, i është ngritur një memorial përkujtimor në nderim të shërbimit të tij në misionin e Kombeve të Bashkuara në Kosovë”, shkruan Kurti.
Ndër të tjera, nisur nga situata e rëndë me luftën në Ukrainë, Kurti uron që familja e tij të jetë shëndosh e mirë, ndërsa thekson solidaritetin me Ukrainën.
Discussion about this post