Jona Mulaj është një vajzë 12-vjeçe nga Tropoja, e cila ka zgjedhur që të bëjë një gjest human për gratë që përballen me kancerin e gjirit.
Ajo ka ardhur posaçërisht sot në Tiranë për të dhuruar flokët e saj të gjatë, të cilët do të bëhen paruke për gratë dhe vajzat që preken nga sëmundja e rëndë.
12-vjeçarja u shpreh se me gjestin e saj dëshiron që të bëjë të lumtur çdo grua që lufton me kancerin e gjirit. “Dua të bëj një grua të lumtur, sikur të ishte mami im” – ka thënë Jona.
Tetori, në të gjithë botën është muaji i ndërgjegjësimit për zbulimin e hershëm të kancerit të gjirit. Muaji i ndërgjegjësimit për kancerin e gjirit është një fushatë vjetore ndërkombëtare që synon të shpërndajë informacion dhe të edukojë njerëzit për rëndësinë e shëndetit të gjirit, për zbulimin e hershëm të kancerit të gjirit te gratë dhe vajzat në të gjithë botën.
